Pak përpara bisedimeve të shumëtrumpetuara me Rusinë, zëvendësministri i Jashtëm i Ukrainës, Sergiy Kyslytsya, është takuar në Stamboll me përfaqësues të Gjermanisë, Italisë dhe Mbretërisë së Bashkuar.
“Palët koordinuan qëndrimet përpara takimit të sotëm mes delegacioneve ukrainase dhe ruse“, pohoi zëdhënësi i ministrisë së jashtme ukrainase, Heorhiy Tykhy, i cili shtoi se Kievi përsëriti pikat e agjendës së tij, duke përfshirë këmbënguljen për një takim mes udhëheqësve të dy vendeve dhe një armëpushim të plotë.
Media shtetërore ruse raportoi më herët se ekipi negociator i Kremlinit kishte mbërritur në qytetin turk që mbrëmjen e 1 qershorit. Po një ditë më parë, sekretari amerikan i shtetit, Marco Rubio, sikurse pohoi DASH, ka komunikuar përmes telefonit me homologun e tij rus, Sergei Lavrov, për të diskutuar rreth pritshmërive nga ky takim.
Sipas DASH-it, telefona u zhvillua me kërkesën e Rusisë, dhe Rubio ka përsëritur thirrjen e presidentit Donald Trump për bisedime të vazhdueshme të drejtpërdrejta për “arritjen e një paqeje të qëndrueshme”.
Pak para nisjes së bisedimeve të armëpushimit sot në Stamboll, Ukraina i kujtoi edhe një herë Rusisë se ende mund t’i bëjë shumë dëme: Me një sulm befasues thellë tokën ruse, ushtria e saj shkatërroi më shumë se 40 avionë të Moskës. Ky përbën sulmin më të madh të Kievit që prej fillimit të luftës. Presidenti Volodymyr Zelensky e përshëndeti këtë goditje të papritur të shërbimit të tij sekret SBU kundër disa aeroporteve ushtarake ruse duke e cilësuar si “absolutisht të shkëlqyer”, e tha se sulmi do të hyjë “në librat e historisë”.
