Kryetarja e Bashkisë së Prrenjasit deklaroi gjatë një interviste për televizionin Fax News se është paralizuar pothuajse gjithçka që kanë të bëjnë me shërbimet publike në këtë qytet për shkak të bllokimit të buxhetit vjetor.
Sipas saj, kopshtet dhe çerdhet nuk kanë ushqime, fadromat për të mirëmbajtur rrugët nuk kanë naftë, zyrat dhe institucionet lokale nuk kanë letër dhe bojë e për rrjedhojë qytetarët vijnë e përplasen në bashki për të kërkuar shpjegime pavarësisht se nuk është përgjegjësi e jona.
“Kjo është një lojë politike, është diçka që është bërë qëllimisht. Taulant Balla e quan Prrenjasin si bastionin e vet, don të zhvillojë bizneset e veta dhe kjo është arsyeja se përse është krijuar kjo situatë. Ky është një urdhër nga deputeti që deri në zgjedhje të pengohet me çdo kusht puna e kryetarit të bashkisë. Kemi thirrur mbledhje të vazhdueshme, por në asnjërën prej tyre nuk kanë ardhur anëtarët e majtë, pasi nxjerrin shpesh justifikime të pakuptimta për mungesën”, – deklaroi Rira.
Ajo tha se përveç fëmijëve të kopshteve dhe çerdheve të cilët kanë ngelur pa ushqim, janë bllokuar edhe ndihmat e 2300 familjeve të cilët trajtohen me ndihmë ekonomike të cilat sipas saj nuk janë tërhequr për shkak të bllokimit të buxhetit.
Kjo sipas Rirës ndodh për arsyen se anëtarët nuk janë paraqitur në mbledhjet e këshillit Bashkiak, dhe kjo bëhet nën dirigjimin e Taulant Ballës, për të dëmtuar kryetaren e bashkisë.
“Kjo ndodh për arsyen se anëtarët nuk janë paraqitur në mbledhjet e këshillit Bashkiak, dhe kjo bëhet nën dirigjimin e Taulant Ballës, për të dëmtuar kryetaren e bashkisë. Ai nuk është buxheti im por i 40 mijë banorëve, dhe të pengosh në mënyrë të vazhdueshme është hajde të bëjmë bllok që qytetarët të mos kenë shërbime dhe faji ti hidhet kryetares së Bashkisë. Kjo është të bësh politikë me fëmijët e vegjël”, – deklaroi Miranda Rira.
Ajo u bëri thirrje socialistëve që ta lënë për në qershor, pasi sipas saj fëmijët e vegjël nuk kanë nevojë për politikë. Familjarët dhe qytetarët në tërësi janë të shokuar nga kjo hakmarrje deklaroi kryebashkiakja.
https://www.facebook.com/faxweb.al/videos/1193791697445331/
(F.GJ/FAXWEB.AL)
