Urdhri i presidentit të Shteteve të Bashkuara, Donald Trump-it për ndalimin e hyrjes së refugjatëve nga shtatë vende të botës në ShBA është cilësuar si “fyes” , nga shteti turk. Të paktën kështu u shpreh zëvendëskryeministri turk, Numan Kurtulmus dhe ky është reagimi i parë i Ankarasë për këtë ligj të Trump-it.
Po kështu Kurtulmus i bëri thirrje Trumpit të rishqyrtojë vendimin pasi është motivuar nga islamofobia, raporton AFP. “Është e pamundur të pranohet kjo. Politika duhet të rishqyrtohet”, tha Kurtulmus, i cili është edhe zëdhënës kryesor i Qeverisë turke.
Kurtulmus tha se është jashtëzakonisht fyese që një vendim i tillë është marrë në një vend si SHBA-ja, që njihet si komb me fe dhe grupe të ndryshme etnike.
Të premten, Trump ka lëshuar një urdhër ekzekutiv që u ndalon hyrjen në SHBA të githë refugjatëve dhe udhëtarëve nga shtatë vende me shumicë myslimane: Irani, Iraku, Libia, Somalia, Sudani, Siria dhe Jemeni. Urdhri akutalisht vlen për 90 ditë. Trump e ka mbrojtur këtë masë, duke thënë se ajo do ta bëjë SHBA-në të sigurt nga “terroristët radikalë islamikë”. (J.V/Shuplaka)
