Çfarë do të ndodhë me ministrat teknikë të Bashës në qeverinë Rama?

Duket se pas fitores së PS-së në zgjedhje e vetme shumë skema që përfliteshin para 25 Qershorit do të ndryshojnë.

Dhe një nga pikëpyetjet që ngrihen është dhe ajo se ç’do të ndodhë me ministrat teknikë që u vendosën në qëverinë Rama pas marrëveshjes së 18 Majit.

A do të vazhdojnë të jenë ata pjesë e qeverisë Rama deri në formimin e qeverisë së re? A do të bashkëjetojë edhe për disa muaj Rama me ta apo do t’i shkarkojë ashtu siç është shprehur kohë më parë.

Kur ka qenë i ftuar në emisionin ‘Opinion’ të gazetarit Blendi Fevziu, Rama ka deklaruar se ministrat teknikë nuk do të jenë më të tillë pas 25 qershorit nëse PS fiton zgjedhjet. Ai tha se do të shkarkohen pasi nuk janë pjesë e programit të qeverisë.

“Në rast se 25 qershori do zgjedhë PS-në në krye të qeverisë, ata s’do jenë më ministra. Ata janë ministra teknikë dhe do largohen nëse ne fitojmë zgjedhjet”, ka deklaruar Rama.

Tashmë na mbetet të presim dhe të shohim nëse Rama vijon me të njëjtin mendim apo fitorja e vetme në zgjedhje e PS-së e ka relaksuar dhe kryeministrin dhe mendon që muajt e verës t’ia desikojë pushimeve dhe jo ndryshimeve në qeveri.

(E.K/SHUPLAKA)