Çfarë premtonte Rama për buxhetin e Arsimit? Deputetet socialite i dalin ‘kundër’ sot: I parealizueshëm

Kryeministri Edi Rama, erdhi në pushtet në vitin 2013 me shumë premtime, ndërsa pak prej tyre i ka realizuar. Ndër premtimet me të cialt u doli para studentëve është edhe ajo e rritjes së buxhetit të Arsimit në 5% të Prodhimit të Brendshëm Bruto (GDP).

“Buxheti i arsimit 5% e PBB; sistem i pavarur për vlerësimin dhe renditjen e shkollave të larta; rrjet i kolegjeve të arsimit profesional”, – thuhej në programin e kryeministrit Edi Rama, por që atëherë kanë kaluar më shumë se 8 vite dhe nga 3.2% të GDP-së është çuar në 3.32%.

Sot një ndër kërkesat e studentëve të cilët kanë 8 ditë që protestojnë në rrugë, është rritja e buxhetit për arsimin në 5% të GDP-së, premtim ky i vetë Kryeministrit. Por çfarë ndodh? Sot ky premtim është i parealizueshëm për deputetët socialistë.

Në një prononcim të dhënë për gazetën “Dita”, mbështesin kërkesat e studentëve, por edhe ata janë të mendimit se 8 pikat duhet të jenë pjesë e një procesi dialogu.

“Si pedagoge, por edhe si nënë e dy vajzave studente mbështes kërkesat e studentëve, por instrumenti demokratik për zgjidhjen e ngërçeve është dialogu”, shprehet deputetja Elona Gjebrea dhe po ashtu të njëjtin mendim ka edhe deputetja Milva Ekonomi.

Ndërsa komentojnë kërkesën e studentëve që buxheti i arsimit të jetë sa 5% e GDP-së, sipas deputeteve në fjalë është i parealizueshëm në këtë moment.

“Kërkesat që lidhen me buxhetin apo GDP-në janë kërkesa që duhet dialoguar për të parë realisht mundësinë e qeverisë”, tha Elona Gjebrea.

“Buxheti 5% është një kërkesë që do kohë, nuk mund të plotësohet me një të rënë të lapsit. Po të shikojmë, buxheti për arsimin ka qenë prioritet dhe është rritur nga 3.2%, sot është 3.32”, tha Milva Ekonomi.

(B.B/ Faxweb.al)