Ka dështuar edhe raundi i dytë i procesit për zgjedhjen e Presidentit të ri të Republikës së Shqipërisë. Mësohet se raundi i tretë do të zhvillohet në seancën plenare të 27 prillit, ora 15:00. Ky është vendimi më i fundit i Konferencës së Kryetarëve.
Me ftesë të kryeparlamentarit Meta, kryetarja e Komisionit të Ligjeve, Vasilika Hysi, bëri me dije sot nga foltorja e Kuvendit se nuk ka ende asnjë kandidat për President të mbështetur nga 20 deputetë. Ajo propozoi mbylljen e seancës plenare të thirrur për herë të dytë pas dështimit të së parës ditën e djeshme.
Pas kësaj kërkese, kryetari i Kuvendit të Shqipërisë, Ilir Meta, kërkoi thirrjen e Konferencës së Kryetarëve për të caktuar raundin e tretë të zgjedhjes së Presidentit të ri, i cili do të mbahet javën e ardhshme.
Referuar Kushtetutës, raundi i tretë duhet të zhvillohet brenda një jave dhe për zgjedhjen e Presidentit duhet të votojnë 84 deputetë pro.
Discussion about this post