Në seancën e sotme gjyqësore ndaj ish-administratorit të DIA-s, Kastriot Ismailaj nuk u paraqitën dëshmitarët, shtetasit e huaj Jozef Hajsek, Tim Shraider, Rebeka Gaiskin.
Gjykata i ka lënë kohë avokatëve të sjellin adresat e reja të tyre në mënyrë që të njoftohen.
Gjithashtu, kryesuesja e trupit gjykues bëri me dije se, nga ana e të pandehurit Kastriot Ismailaj është bërë kallëzim ndaj prokurores Antoneta Sevdari për veprën penale “shpërdorim detyre” pasi sipas tij, ka hequr nga fashikulli i hetimit prova të mbledhura dhe që flisnin në favor të të akuzuarit.
Ismailaj ka paditur penalisht edhe shtetasin Ardian Suku për dëshmi të rreme. Ky shtetas e kishte paditur Kastriot Ismailajn se nuk i kishte paguar shpenzimet për punën e bërë.
Në seancën kundër Ismailajt, Suku ishte shprehur se “nuk kishte bërë asnjë punë për DIA-n”.
Kastriot Ismailaj, administrator i disa kompanive, një prej të cilave ajo me aktivitet kryesor mbledhjen e borxheve të kompanisë së shpërndarjes së energjisë elektrike, akuzohet se me anë të manovrave financiare ka krijuar një skemë mashtrimi të madhe, me qëllim përfitimin e padrejtë të pasurive në vlerën e miliona eurove.
Sipas Prokurorisë, ai krijoi disa kompani fiktive, pa aktivitet, por që në llogaritë bankare të tyre qarkullonin para në vlera disa milionë euro. Një nga kompanitë fiktive ishte dhe “Debt International Advisory” me të cilat Ismailaj ka arritur të vjedhë 5 milionë euro, para të cilat ua mblidhte debitorëve si administrator i CEZ por që në vend t’ia dorëzonte kompanisë i rinvestonte, duke i transferuar jashtë vendit për qëllime personale. (A.R/SHUPLAKA)
Discussion about this post