Ish drejtoresha e Spitalit Rajonal Dibër Irini Shehu është vënë nën masën e arrestit me urdhër të prokurorisë së shkallës së parë të juridiksionit të Përgjithshëm Dibër.
Masa e arrestit erdhi pas disa denoncimeve të bëra nga mjek të spitalit për kërcënime dhe fyerje ndaj tyre nga ana e Shehut. Ndërkohë, situata ka agravuar në maksimum një ditë më parë teksa Shehu ka hyrë në ambjentet e spitalit dhe është konfliktuar me drejtorin e ri Ruzhdi Deda që e ka zëvendësuar pas shkarkimit për dhunë ndaj ish shefit të financës Shaban Uklala.
Menjëherë pas përplasjes me Ruzhdi Dedën teksa ky i fundit ka njoftuar policinë, Shehu ka kërkuar trajtim mjekësor duke pretenduar se ka probleme kardiake. Ajo ka hapur një kartelë shtrimi dhe qëndron në një nga dhomat e spitalit.
Nisur nga kjo, blutë e Dibrës e kanë patur të pamundur dërgimin e saj në dhomat e paraburgimit.
Shehu është mbajtur nën vëzhgim nga policia gjatë gjithë kohës, ndërsa pritet që mjekët të japin rezultatet e gjendjes së saj shëndetësore dhe ta dërgojnë në rajonin e drejtorisë vendore të policisë Dibër.
Kujtojmë se ndaj 44 vjeçares Irini Shehu ka disa kallzime në polici për dhunë fizike dhe psikologjike, e po ashtu kërcënime nëpërmjet thirrjeve apo mesazheve telefonike.
Irini Shehu mban gjithashtu postin e Kryetares së Këshillit të Bashkisë Dibër që prej vitit 2023, në radhët e Partisë Socialiste.
