Vrasja e Pëllumb Metës ka tronditur Shënavlashin në Durrës. 50-vjeçari ishte deklaruar i humbur prej 10 ditësh dhe u gjet nga policia i groposur pranë banesës së tij, dyshohet të jetë vrarë nga e bija Hygerta 19 vjeçe, pasi donte ta fejonte me dikë pa dëshirën e saj.
Për mediat foli krushuku i Pëllumbit. Ai nuk ka patur dijeni për konflikte në familje, teksa thuri lëvdata si për të ndjerin ashtu edhe për Hygertën si një vajzë të respektuar. Ai nuk beson të jetë një krim që ta ketë kryer ajo.
“Nuk di asgjë, nuk kam asnjë informacion, Pëllumbi ishte zotëri burrë, është nga Kruja. Është vendosur këtu, ka vite. Ka pasur familje të mirë, me sa e njohim neve. Ai punonte roje tek varrezat e makinave. Një nga vajzat e tij e ka djali im, e njohim si familje të mirë. Nuk e kemi ditur çfarë konfliktesh kanë pasur. Rreth 2 javë më parë na thanë që ka humbur, më vonë morëm vesh që u gjet makina. Sot na njoftuan që është gjetur.
Vajza nuk mbyt dot një pulë, jo më njeri. Nuk e di a ka persona të tjerë të përfshirë. Janë çështje familjare, ishte shumë e mirë, studentë, nuk të shkon mendja që ajo ka bërë këtë veprim. S’kam informacion fare që vajza do të fejohej, s’dimë të kenë pasur konflikte. Ka ndodhur kjo, ndoshta ia kanë lënë vajzës”, u shpreh ai.