Avokati i Popullit, Igli Totozani ka reaguar mbi ngjarjen tragjike në Durrës, ku mëngjesin e sotëm u gjet i vdekur një endacak i moshës 30-35 vjeçare.
Totozani shpreh dhimbjen e tij për për humbjen e jetës së një njeriu të pastrehë, për shkak të të ftohtit.
“Kjo është një tragjedi njerëzore e paralajmëruar. Drejtuesit vendor nuk duhet të presin që të pastrehët apo të vobektit t’u zënë derën e zyrës, por të dalin vetë në terren së bashku me stafet e tyre, të identifikojnë qytetarët në nevojë dhe t’u ofrojnë atyre ndihmë dhe strehë”, shprehet Totozani.
Sakaq, ai i bën thirrje qytetarëve që sa herë të shohin në rrugë njerëz të pastrehë, fëmijë apo të moshuar të braktisur, të njoftojnë menjëherë organet lokale dhe punonjësit e Policisë së Shtetit.
Beni, qytetari endacak i lagjes 17 në Durrës ka ndërruar jetë gjatë natës që lamë pas, për shkak të temperaturave të ulëta.
Trupi i tij është gjetur i ngrirë rreth orës 7-8 të këtij mëngjesi. Ai ishte i pastrehë por e gjithë lagja 17 në qytetin bregdetar e njihte dhe e ndihmonte. Mësohet se ky qytetar njihej nga banorët edhe si peson me problem të karakterit mendor. (D.D/Shuplaka)
