E shtuna e këtij 5 Dhjetori i ka gjetur pafjalë, por me kurajo për të vazhduar misionin të gjithë punonjësit e Fax News dhe Faxweb, që humbën presidentin e tyre Kasem Hysenbelliu. Presidenti u nda nga jeta në moshën 59-vjeçare në Turqi, ku luftoi për disa javë me Covid 19, e siç ndodhte rrallë e për mos të thënë kurrë për karakterin e tij, nuk mundi që ta fitonte.
Lidhje me këtë humbje të rëndë kanë reaguar të gjithë miqtë dhe bashkëpunëtorët e tij gjatë viteve të gjata që ka qenë në media dhe në jetën aktive. Edhe ambientalisti Sazan Guri ka shprehur ngushëllimet për familjen ndërsa e kujton Kasem Hysenbelliun si themeluesin e një televizioni që nuk bën lajme të rreme, e as misione tralala, por misioni më i madh është i qytetarit.
Nuk lë pa përmendur intervistën me gazetarin Fatjon Gjinaj teksa shprehet se Fax News ishte e vetmja media që mbërriti ditën e djeshme në Dajt dhe zhvilloi bisedë me Sazan Gurin. Sipas ambientalistit, humbja e Kasem Hysenbelliut nuk është vetëm për familjen, por edhe për stafin e qytetarët.
“Dhe pardje u nisa në 5.30 për në Dajt. Kush është ajo media që vjen me shpenzimet e veta? Ky televizion ishte zëri i arsyes, zëri i qytetarëve, ishte zëri misionar. Nuk kishte as lajme të rreme, as tangërllikse, as shpëlarje truri, as misione tralala. Misioni më i madh këtu është qytetari.
Njerëzit e kishin një dritare, ku mbështeteshin. Kjo është keqardhja që ky njeri e ndërtoi me zërin e arsyes, të qytetarëve, por nga humbja e tij nuk humb vetëm familja, por edhe ju, edhe ne.
Duke jetuar në kushtet shqiptare që mediat dominohen nga qeveria dhe aspak me zërin e qytetarëve. E vetmja që doli e lirë ku qytetari shikonte e ndjente veten, ishte kjo.
Ky shpërtheu me lirinë e vet, i dha liri medias dhe qytetarëve”, tha Sazan Guri.
(A.M/Faxweb.al)
