Raportuesi për Shqipërinë në Parlamentin Evropian Knut Fleckenstein, në një intervistë për gazetën “TemA”, u bën thirrje palëve politike që të bashkëpunojnë ngushtësisht me OSBE/ODIHR, për të siguruar më 18 qershor zgjedhje demokratike.
“Liria e shprehjes është një nga të drejtat më të rëndësishme në demokracitë e Evropës dhe ne duhet të bëjmë më të mirën tonë për të respektuar dhe mbrojtur këtë të drejtë themelore të qytetarëve tanë. Zbatimi i reformës së gjyqësorit do ta çojë Shqipërinë përpara procesit për anëtarësimin në Bashkimin Evropian. Qeveria, Parlamenti, administrata zgjedhore, media, të gjitha partitë politike dhe të gjithë votuesit duhet të japin kontributin e tyre që të sigurojnë zgjedhje të lira e të ndershme në Shqipëri,” u shpreh ai.
Teksa foli më shumë për zgjedhjet e ardhshme parlamentare në vend, Knut Fleckenstein tha se palët politike duhet të kenë kujdes që mos të kandidojnë persona me dosje kriminale dhe mos të tentojnë të blejnë vota.
“Votuesit duhet të bëjnë një zgjedhje të vetëdijshme dhe t’ia japin votën atyre kandidatëve që ata i konsiderojnë më kompetentë, me integritet dhe kush mbron idetë e tyre politike. Palët duhet të emërojnë kandidatë pa dosje penale dhe duhet të heqin dorë nga përpjekja për të blerë vota. Qeveria dhe Parlamenti janë përgjegjëse për ligjin zgjedhor dhe reformimin e tij. Administrata zgjedhore duhet të sigurojë një përgatitje dhe organizim profesional. Media duhet të japë një zë për të gjitha palët dhe shqetësimet, duke respektuar dispozitat e ligjeve përkatëse. I bëj apel qeverisë, Parlamentit, mazhorancës dhe opozitës, të bashkëpunojnë ngushtësisht me OSBE-në dhe ODIHR, në mënyrë që të sigurojnë zgjedhje demokratike. Ato duhet të jenë të denja për një anëtar të ardhshëm të Bashkimit Evropian,” shprehet Kleckenstein.
(M.D/ Shuplaka)
