Flet Nuel Kalaj, marrëdhënia me Berishën dhe të birin, tregon pse tërhoqi 7 milionë euro në 2009-tën

Ai ka qenë padyshim një nga emrat më të përmendur ditët e fundit për përfshirjen e tij me aferën CEZ. Nuel Kalaj I akuzuar nga kryetari i Komisionit Hetimor për CEZ, Taulant Balla si sekseri mes familjes Berisha dhe CEZ ka rezguar për herë të parë në një intervistë për një të përditshme.

Ai shprehet se është kontaktuar nga kompania CEZ për të mbledhur informacione lidhr me fizibilitetin e tregut energjitik në Shqipëri për investime. Në lidhje me Shkëlzen Berishën ai është shprehur se nuk ka asnjë gjë të përbashkët me të dhe se me ish-kryeministrin Berishaështë takuar si pjesë e delegacionit të kompanisë Çeke kur ata kishin ardhur në Tiranë.

Në lidhje me aktivitetin e tij si negociator mes CEZ dhe qeverisë shqiptare Kalaj është shprehur se ka bashkëpunuar në përputhje me ligjet e vendit tonë. Kalaj nuk mohon se nga bashkëpunimi me CEZ të ketë nxjerrë fitime të ligjshme, duke paguar edhe taksa për to. Ai përgjigjet dhe akuzave për tërheqje të mëdha cash nga banka duke thënë se ato i ka përdorur për investime të tjera.

Komisioni Parlamentar ju akuzon ju si sekserin e qeverisë Berisha që ‘’lidhi martesën’’ me kompaninë CEZ. Çfarë lidhjesh keni ju me çekët dhe kompaninë CEZ?

Bashkëpunimin me CEZ-in e kam pasur të bazuar mbi marrëdhënie kontraktuale dhe ligjore. Nuk jam sekser i askujt, pork am punuar për të sjellë CEZ-in në Shqipëri dhe për këtë kam pasur fitimet e mija në mënyrë të rregullt dhe të ndershme duke paguar taksat.

Ju akuzoheni se në llogaritë tuaja bankare janë mbi 7 milionë Euro të cilat janë tërhequr cash në 2009-të nga banka të nivelit të dytë në Shqipëri, pak para zgjedhjeve. E mohoni një akuzë të tillë.

Paratë i kam tërhequr nga banka për qëllime investimi dhe drejtime te tjera. 

Çfarë ju lidh me Shkëlzen Berishën dhe a jeni takuar ju me ish-kryeministrin Berisha në lidhje me çështjen CEZ?

Me Shkëlzen Berishën nuk kam asnjë lidhje. Nuk i kam premtuar askujt organizimin e takimeve me të. Me ish-kryeministrin Berisha jam takuar si pjesë e delegacionit të CEZ-it kur ata kanë ardhur në Tiranë. E gjithë veprimtaria ime ka qenë në përputhje me ligjet e Shqipërisë dhe Çekisë ku zhvillon aktivitetin e saj kompania CEZ.

Me çfarë statusi keni negociuar për ardhjen e CEZ-it në Shqipëri?

Nuk kam negociuar, po kam pasur një kontratë për të mbledhur informacionet e nevojshme për nevojat që kjo kompani kishte në Shqipëri. (E.K/SHUPLAKA)