Franca konfirmon zyrtarisht se për Shqipërinë nuk do ketë kushte shtesë dhe se zbatimi i Vettingut është i rëndësishëm për hapjen e negociatave për integrim.
“Nuk do të ketë kushte shtesë për hapjen e negociatave për Shqipërinë. Shqipëria ka një rrugë të gjatë për të bërë dhe duhet të avancojë në shumë drejtime siç janë: lufta kundër korrupsionit, krimit të organizuar, trafiqeve, bashkëpunimit në fushën e policisë apo atë të drejtësisë”, shprehet Harlem Desir, sekretari i Përgjithshëm i Shtetit francez.”, tha sekretari i Shtetit francez Harlem Desir, në një intervistë për televizionin “Top Channel”.
Ndër të tjera, zoti Desir u shpreh se Franca do ta mbështesë Shqipërinë në rrugën e anëtarësimit në Bashkimin Europian.
“Shqipëria ka bërë një punë të madhe dhe të vështirë në lidhje me reformën në drejtësi. Ne do të jemi shumë të vëmendshëm për mënyrën sesi kjo reformë do të zbatohet dhe duke nisur nga viti i ardhshëm, nisur nga progresi që është bërë, do të jemi në gjendje të përcaktojmë qëndrimin tonë në lidhje me hapjen e negociatave për anëtarësimin e plotë të Shqipërisë në Bashkimin Europian. Komisioni Europian ka bërë një raport pozitiv në lidhje me rrugën e përshkuar nga Shqipëria në drejtim të reformave dhe në përpjekjet që janë bërë për zbatimin e 5 prioriteteve kyçe të kërkuara nga Bashkimi Europian. Tani duhen bërë hapa të tjerë përpara siç është vënia në zbatim e reformës në drejtësi; ligji i Vettingut ose siç njihet ndryshe rivlerësimi i figurës së gjykatësve dhe prokurorëve. Pas vënies në zbatim të reformës në drejtësi, por edhe të aspekteve të tjera, vendet europiane do të marrin vendimet e tyre. Duhet të dini që Franca së bashku me vendet e tjera të BE-së do të jenë gjithmonë mbështetëse të Shqipërisë dhe do ta ndihmojë atë në vënien në zbatim të reformës në drejtësi.”, tha sekretari Desir.
Sekretari i shtetit francez ndodhej në Tiranë për ceremoninë e hapjes së zyrës rajonale për rininë.
