Pedagogu dhe akademiku Artan Fuga prej ditësh po shpreh opinionet e tij në lidhje me protestën që po zhvillohet nga opozita. Ai është shprehur në mbështetje të kauzës për zgjedhje të lira dhe padyshim që qeveria teknike do të ishte njëra nga zgjidhjet.
Ndërkohë që ai kërkon që qeveria teknike të pasohet edhe nga një ndryshim i Kodit Elektoral në mënyrë që Partitë Politike të hyjnë në zgjedhje me të drejta të barabarta.
‘’Jo vetëm qeveri teknike por edhe ndryshim rrënjësor të kodit elektoral, ku kandidatët e pavarur, partitë e mëdha, të vogla, brenda dhe jashtë parlamentit të kenë shanse të njejta.
Lulzim Basha duhet që kërkesën për qeveri teknike ta plotësojë me kërkesën për ndryshimin rrënjësor të ligjit elektoral! Për të siguruar zgjedhje të lira, të barabarta, të drejtpërdrejta, të drejta, sepse deritani nuk janë të tilla, janë mashtrime me ne qytetarët. Me këtë ligj ne votojmë për dikë ndërsa vota jonë i numurohet një tjetri.
Ligji elektoral na tall si zgjedhës!
Kjo do të ishte vërtet sinqeritet në se dëshiron të mos mendojë për pushtetin, por për demokracinë dhe qytetarin!’’, ka shkruar Fuga. (E.K/SHUPLAKA)
