Qeveria gjermane kërkon që çështja e Ramush Haradinajt të mbyllet sa më shpejt. Ka qenë Sekretari Shtetëror në Ministrinë e Jashtme të Gjermanisë Stefen Steinlein, ai i cili i ka dërguar një letër Kryetarit të Asociacionit Gjermano-Kosovar të Bizneseve, Dr. Friedbert Pflüger.
“Ministria e Punëve të Jashtme të Gjermanisë i jep peshë të veçantë arrestimit të Ramush Haradinajt dhe për këtë rast është në kontakt të ngushtë me partnerët e saj, posaçërisht, Francën”, shkruan Steinlein.
Ndër të tjera, sekretari gjerman e cilëson arrestimin e kreut të AAK-së në Kosovë, si një faktor ndikues në përkeqësimin e stabilitetit të Ballkanit Perëndimor.
“Arrestimi i Haradinajt ndikon tej mase në përkeqësimin e situatës në Ballkanin Perëndimor dhe duhet një përmirësim urgjent i bashkëpunimit rajonal dhe normalizimit të marrëdhënieve mes Kosovës dhe Serbisë të cilat me këtë rast do të vështirësoheshin. Për këtë shkak Qeveria e Gjermanisë qysh në vitin 2005 ka vendosur që fletarrestimin për Ramush Haradinajn të mos e zbatojë… Dhe dua t’ju siguroj që Ministria e Punëve të Jashtme është duke e përcjellur me vëmendje të saktë dhe duke shikuar të shfrytëzohet çdo mundësi që të gjendet një zgjidhje e mirë”, shton Steinlein.
Ramush Haradinaj u arrestua më 4 Janar për shkak të disa fletë-arresteve serbe të lëshuara që në vitin 2004. Ai mbahet akoma në Francë në liri me kusht, derisa Gjykata Franceze në Colmar të marrë vendimin më 2 mars. (D.D/Shuplaka)
