Një gruaje nga Pogradeci, sëmundja e Tropozës i ka kushtuar dy këmbët e saj. Prej më shumë se 7 muajsh, Adriatike Muço nga Trebinja e Pogradecit dergjet në shtrat për shkak të sëmundjes së rëndë e cila në fillim i mori njërën këmbë, ndërsa para pak javësh mjekët u detyruan t’i presin edhe këmbën tjetër.
Por pavarësisht kësaj, shteti ende nuk i ka lidhur 42-vjeçares një pension invaliditeti. Të afërmit e Adriatikes shprehen se i kanë letrat për trajtimin e saj me pension invalidi, por për shkak të ndryshimeve ligjore ku kërkohet që në pesë vitet e fundit zonja të ketë të paktën një vit të siguruar, pensioni nuk përfitohet.
Adriatikja nuk ka sigurime shoqërore, pasi siç ndodh me shumë shqiptarë, atje ku ajo ka punuar për tetë vite me radhë, nuk ia kanë paguar.
Deputetja e Qarkut të Korçës Eleina Qirici e vizitoi zonjën këtë të shtunë, për t’u njohur nga afër me situatën e saj. Qirici i premtoi Adriatikes se do të ndjekë çdo rruge ligjore në mënyrë që ajo të përfitojë atë ç’ka i takon në gjendjen në të cilën ndodhet. Deputetja ka nisur që sot nga puna, dhe pret që rezultatet e para të dalin që javën e ardhshme. (D.D/Shuplaka)
Discussion about this post