Në zgjedhjet e fundit parlamentare në Maqedoni, nga radhët e partisë së Gruevskit doli deputet edhe një i dënuar për krime lufte kundër shqiptarëve në konfliktin e 2001. Kjo është një ngjarje e rëndë duke ditur konfliktet etnike që kanë ekzistuar dhe ekzistojnë në Maqedoni me popullsinë shqiptare.
Bëhet fjalë për Johan Tarculovski, i vetmi shtetas maqedonas i dënuar nga Gjykata e Hagës për luftën e 2001.
Ai u zgjodh deputet në njësinë zgjedhore numër dy të Maqedonisë, që përfshin veri-lindjen e vendit, gjithashtu edhe një pjesë të kryeqytetit Shkup.
“Ai është heroi ynë dhe ne jemi krenarë që e kemi në radhët tona. Kush më mirë se ai do të mbrojë interesat e maqedonasve në Parlamentin tonë”, citohet nga agjencia BIRN një drejtues i lartë i VMRO-DPMNE.
Tarculovsky, ish-pjesëtar i policisë maqedonase, u dënua me 12 vite burgim nga Haga për krime kundër civilëve shqiptarë në fshatin Ljuboten, pranë Shkupit. Ai u lirua në vitin 2013 pas 8 vitesh në qeli. Vetë Tarculovski nuk ka dhënë asnjë deklaratë pas zgjedhjes si deputet në parlamentin me 120 vende. (E.K/SHUPLAKA)
Discussion about this post