Deputetja e PDIU-së Mesila Doda reagon kundër vendimit të qeverisë, që komisioni i verifikimit të kandidatëve për Vettingun të mos i përfshijë të tre partitë kryesore të koalicionit qeveritar.
Socialistët propozuan Ulsi Manjën dhe Vasilika Hysin, LSI-ja Luan Ramën dhe PDIU-ja kryetarin Shpëtim Idrizi, mirëpo ky nuk u pranua.
Doda shprehet e revoltuar për përjashtimin e Idrizit. Më tutje ajo e cilëson këtë si arrogancë të PS-së.
“Pasi shkatërruat kompromisin me opozitën, shkatërruat edhe kompromisin brenda shumicës. Sot shqiptarët kanë parë fytyrën e politikës, të gjithë palët kanë frikë nga ajo që mund të vijë. Prandaj ndryshimet kushtetuse e çuan grupin parlamentar në këtë pikë.
Nuk u mor në shqyrtim kërkesa jonë për kandidaturën e deputetit Shpëtim Idrizi, me arsyetimin se ne duhet të kemi dy se jemi më shumë, LSI-ja 1, ndërsa grupi tjetër të mos përfshihet fare. Nëse kjo çështje do ishte çështje numrash, nuk mendoj se kjo do duhej 50-50. ”, tha Doda.
“Sot kemi gjysmën e parlamentit që mungon se kanë frikë nga Vettingu. Unë mendoj se edhe kjo gjysma nuk i është shtrirë ende dora e bashkëpunimit. Njëra palë bën arrogantin, tjetra palë bën cinikun. Po flas thjesht si një qytetare që i ka ardhur në majë të hundës,”, vazhdon më tej deputetja. (D.D/Shuplaka)
