Njëzet vjet pas tërmetit shkatërrues dhe cunamit që mori më shumë se 230 000 jetë në rajonin e Oqeanit Indian, mijëra njerëz u mblodhën në kryeqytetin e provincës Aceh të Indonezisë për të përkujtuar tragjedinë. Ceremonia, e mbajtur në xhaminë ”Baiturrahman” në Banda Aceh, mblodhi së bashku të mbijetuarit, familjet e viktimave dhe anëtarët e komunitetit në një akt prekës përkujtimor.
Ngjarja përmbante lutje, momente heshtjeje dhe dëgjime treminutësh të sirenave të sistemit të paralajmërimit të hershëm të cunamit. Pjesëmarrësit reflektuan mbi fatkeqësinë që shkatërroi komunitete të tëra në Aceh, provinca më e goditur nga katastrofa e vitit 2004.
Me temën “Aceh Thanks the World”, përvjetori vuri në pah edhe solidaritetin e jashtëzakonshëm global të shfaqur pas cunamit. Përfaqësues ndërkombëtarë iu bashkuan përkujtimit, duke nderuar mbështetjen e ofruar nga vendet dhe organizatat në rindërtimin e rajonit. “Kjo është më shumë se një kujtesë e një tragjedie”, tha Zahrol Fajri, kreu i zyrës së Sheriatit në Aceh.
”Ka të bëjë me promovimin e ndërgjegjësimit kolektiv për gatishmërinë ndaj fatkeqësive dhe festimin e qëndrueshmërisë dhe unitetit që kanë përcaktuar rimëkëmbjen tonë”, shtoi ai. Cunami i vitit 2004, i shkaktuar nga një tërmet nënujor me magnitudë 9,1 ballë Rihter, ”fshiu” një pjesë të madhe të bregdetit të Aceh, ku humbën jetën më shumë se 170 000 njerëz. Fatkeqësia shkaktoi një përgjigje të paprecedentë ndërkombëtare, me miliarda dollarë ndihma që derdheshin në Indonezi për ndihmë dhe rindërtim.
Discussion about this post