Interpol Tirana, në bashkëpunim të ngushtë me partnerët ndërkombëtarë në Itali dhe Greqi, ka finalizuar me sukses ekstradimin e katër shtetasve të akuzuar ose dënuar për përfshirje në veprimtari kriminale, kryesisht në fushën e narkotikëve.
Si rezultat i bashkëpunimit operacional mes strukturave homologe të Interpol-it në Tiranë, Romë dhe Athinë, u realizuan këto ekstradime:
- Altin Merdani, 46 vjeç – U ekstradua nga Greqia në Shqipëri. Merdani ishte dënuar nga Gjykata e Gjirokastrës në vitin 2017 me 4 vjet e 8 muaj burg për veprën penale “Prodhimi dhe shitja e narkotikëve”. Në vitin 2015, në bashkëpunim me dy shtetas të tjerë, ai kishte transportuar rreth 100 kg cannabis në fshatin Frashër të Përmetit. Gjatë këtij aktiviteti kriminal, tre personat u qëlluan me armë dhe njëri prej tyre mbeti i plagosur. Merdanit i kanë mbetur për të vuajtur rreth 2 vjet e gjysmë burgim.
- Fatmir Isollari, 58 vjeç – U ekstradua nga Shqipëria në Itali, pasi Gjykata e Apelit e Firences e ka dënuar me 7 vjet burgim për trafikim të kokainës në kuadër të një organizate kriminale.
- Xh. H., 30 vjeç – U ekstradua nga Shqipëria në Itali. Ai ishte në kërkim nga Gjykata e Romës, që i kishte caktuar masën “arrest në burg” për veprat penale trafikim i lëndëve narkotike, pjesëmarrje në komplot kriminal dhe zhvatje në rrethana rënduese.
- A. A., 27 vjeç – Gjithashtu u ekstradua nga Shqipëria në Itali. Ai kërkohej nga Gjykata e Romës për trafikim të lëndëve narkotike dhe ishte subjekt i një urdhri ndërkombëtar arresti.
Interpol Tirana nënvizon se bashkëpunimi ndërkombëtar mbetet thelbësor për goditjen e krimit të organizuar dhe për ndëshkimin e personave që tentojnë t’i shpëtojnë drejtësisë.
