Anëtari i Bandës së Durrësit, Indrit Taullai ka dalë sot para Gjykatës së Prizrenit, ku i është vendosur masa e sigurisë ’40 ditë burg’.
Taullai u ndalua para dy ditësh në Kosovë nga autoritetet kosovare pasi dyshohet që ka kryer vrasje të rëndë të kryer në kuadër të grupit të strukturuar kriminal. Ndalimi i Taullait është bërë nga ana e Interpol, me urdhër të SPAK-ut.
Ngjarja për të cilën dyshohet këtë herë Indrit Taullai ka ndodhur në 2019 në qytetin bregdetar të Durrësit.
Kush është Indrit Taullai
Indrit Taullai ka qenë i dënuar me 25 vite burg, pasi u árrestua si pjesë “Bandës së Durrësit”, të cilët akuzohen për një sërë vrasjesh për hakmarrje ndaj grupeve kriminale rivale. Më herët ai ishte liruar nga burgu nga një vendim i Gjykatës së Lartë, pasi vuante nga sëmundje e rëndë, ku argumentohej se duhej të trajtohej në kushte spitalore, jashtë ambienteve të burgut.
Pak orë pas vendimit të Gjykatës së Lartë, e cila pranoi më 29 qershor 2017 kërkesën për lirimin me kusht të Indrit Taullait, ky i fundit ka lënë qelitë e burgut.
Vendimi i Gjykatës së Lartë erdhi pas kërkesës së Taullait, pasi vuante nga një sëmundje e rëndë. Ishanëtari i “Bandës së Durrësit”, Indrit Taullai i shpëtoi dënimit me “burg përjetë”, pas rekursit në Gjykatën e Lartë, e cila e transferoi atë në burgun e sigurisë së zakonshme në Durrës, prej nga ku edhe la qelinë disa orë më pas. Taullai, i cili ishte dënuar nga gjykata me 25 vite burg, akuzohej për disa vepra penale.
“Banda e Durrësit”, ku ai bënte pjesë ka nisur të veprojë në qytetin bregdetar prej vitit 1998, kur Lulzim Berisha, i cili gjithashtu është në liri me kusht, në bashkëpunim me Plaurent Dervishaj, Adriatik Colin, Klodian Saliun dhe Ilir Xhungën vranë me armë zjarri Dritan Sallakun.
Seriali i vrasjeve vijoi edhe në pranverën e vitit 2006, ku u árrestuan shtatë persona, mes të cilëve katër të akuzuar si vrasës me pagesë. Njëri prej tyre, Adriatik Coli u pendua dhe bashkëpunoi me drejtësinë pas riatdhesimit nga Italia. Edhe ky i fundit përfitoi lirinë në vitin 2015.
