Fillimi i vitit 2018 është një moment për të bërë bilancin e atij që lamë pas. Dhe “Gazzetta Dello Sport” ka analizuar të gjitha skuadrat italiane, por edhe individët e veçantë për atë që kanë bërë gjatë vitit kalendarik 2017.
Nuk mund të mungonin as shqiptarët, të cilët janë protagonistë për sezonin e kaluar, por edhe në fillimin e këtij viti në Serinë A. Jo pak po tre prej tyre renditen në listën e më të mirëve.
Dy portierët Thomas Strakosha dhe Etrit Berisha nuk mund të mungonin në renditjen e 10 gardianëve që kanë bërë më shumë pritje gjatë vitit që lamë pas. I pari nuk ka qenë titullar fiks dhe për këtë fakt renditet i pesti pas Kordazit, Donarumës, Konsiljit dhe Sorrentinos.
Por, Strakosha duhet të jetë krenar, pasi ka lënë pas portierin e Interit, Samir Handanoviç, dhe të tjerë. Ai gjithashtu ka fituar edhe “duelin” në distancë me portierin tjetër të Kombëtares Etrit Berisha.
Ky i fundit renditet në vendin e 8-të me 90 pritje, kundrejt 111 të Strakoshës. Por, përveç dy portierëve, një vend nderi në bilancin e vitit që lamë pas e ka fituar edhe mbrojtësi i Napolit, Elseid Hysaj, shkruan ‘’Panorama Sport”.
Shkodrani është lojtari i tretë në kampionatin italian për rikuperim topash. Ai kalohet nga Shkriniar i Interit dhe Torreira i Sampdorias. Me 280 rikuperime në total, mbrojtësi kuqezi thyen edhe shokun e tij të skuadrës Kulibali dhe mesfushorët Bilja dhe Zhorzhinjo.
Një arsye për të kuptuar pse Hysaj gjendet më pak herë në vijën fundore të kundërshtarëve, pasi detyrat e tij janë mbrojtëse dhe në duelet një kundër një është thuajse më i miri në rolin e tij në Itali.
(E.K/FAXWEB)
