Demokratja Jozefina Topalli akuzoi kryeministrin Edi Rama që nuk ishte i pranishëm në seancën plenare për shkarkimin e tre kompozitorëve Shpëtim Saraçi, Edmond Zhulali, Alfred Kaçinari, denoncim i bërë fillimisht nga kreu i Departamentit të Kulturës në PD, Arben Skënderi.
Topalli kërkoi ndërgjegjësim nga ana e deputetëve, e ministrave përballë kësaj padrejtësie ku kryeministri që nuk kap qëllimisht Balilin, kapet me tre kompozitorë të mirënjohur.
“Kam një pyetje për ata pak njerëz që janë këtu. Dje, drejtori i RTSH-së ka marrë vendimin për të shkarkuar Shpëtim Saraçin, Edmond Zhulalin, Alfred Kaçinarin. Ka rënë krenaria e kombit shqiptar. Balili nuk kapet, por shkarkoni kompozitorët e nderuar.
A jeni njerëz, a jeni deputetë? Edhe këtu do të arrijë hakmarrja personale e kryeministrit që ka mbaruar Akademinë e Arteve? Pasi mbylli Akademinë Kulturore në Shkodër kur erdhi në pushtet, sot në fund të mandatit shkarkon tre mjeshtra. Apo nuk ka rëndësi kjo?
Këto kohë nuk janë normale, janë kohë të rrezikshme. I sugjeroj opozitës të bëjmë mocion “Qeveria ka rënë”. Ku janë kryeministri, kryetari i Kuvendit? Nuk kanë ardhur se s’kanë kurajo të përballen. Ky është fundi, kjo është rënia e shtetit shqiptar.”, u shpreh ajo. (XH.A/SHUPLAKA)
