Avokati i Popullit ka bërë publike numrin e kandidatëve që kanë plotësuar dhe nuk kanë plotësuar kriteret për të qenë pjesë e komisioneve për rivlerësimin kalimtar të gjyqtarëve dhe prokurorëve, pjesë e reformës në drejtësi.
Përmes një deklaratë për mediat, Igli Totozani tha se 27 marsi ishte afati i fundit për dorëzimin e dokumentacionit, ndërsa dokumentet janë dorëzuar tek Operacioni ndërkombëtar i Monitorimit (ONM). Avokati i Popullit u shpreh se janë 84 kandidatë që kanë plotësuar kriteret për të qenë pjesë e komisioneve e të Vettingut si dhe 109 kandidatë të tjerë që nuk i kanë plotësuar kriteret.
‘’Numri i kandidatëve që plotësojnë kushtet formale është 84 ndërsa 109 të tjerë nuk i kanë plotësuar kushtet formale. Aktualisht i kemi dorëzuar ONM listat e kandidatëve që i plotësojnë kushtet dhe ato që nuk i plotësojnë.
Ekspertët e Avokatit të Popullit kanë punuar me profesionalizëm. Më lejoni të shpreh mirënjohjen për ekspertët ndërkombëtarë’’, u shpreh ndër të tjera Totozani.
(E.K/SHUPLAKA)
