Komisioni zgjedhor i zgjedhjeve miratoi sot kërkesën e PD-së për shtyrjen e “vendimmarrjes për ndarjen e mandateve zgjedhore në Kuvendin e 2017-ës”. Kërkesa u miratua me 6 vota pro dhe 1 votë kundër.
Vendimi përfundimtar për këtë çështje do të merret në mbledhjen e datës 3 dhjetor.
Materiali i kërkuar nga Drejtoria e Përgjithshme e Gjendjes civile ishte shumë voluminoz sipas Përfaqësuesit ligjor të PD-së në KQZ, Ivi Kaso, i cili për këtë kërkoi më shumë kohë për shqyrtimin e tij.
“Gjendja civile ka mbyllur sytë për manipulimet me zgjedhësit në të kaluarën, ndaj kërkojmë më shumë kohë për të parë të dhënat që na kërkon Gjendja civile.“, u shpreh ai.
Ndërsa përfaqësuesi ligjor i PS-së, Genc Gjoncaj, tha se opozita e ka marrë materialin që të premten dhe ka patur kohën e mjaftueshme për ta shqyrtuar.
Ndërsa kryetari i komisionit, Denard Biba u shpreh:“Mos kërkoni shtyrje të mëtejshme pasi nuk vazhdon pa fundësisht kjo histori”.
KQZ do të mblidhet të enjten për shpalljen e rezultatit përfundimtar të zgjedhjeve për kryebashkiak në Kolonjë, ku fitues u shpall Ilia Stefo, kandidati i PS-së.
Discussion about this post