Presidenti i republikës, Bujar Nishani nëpërmejt një njoftimi nga institucioni i presidencës ka njoftuar se do dal në një konferencë për mediat në orën 14:00 ditën e sotme. Kjo dalje e presidentit është në lidhje me hapjen e dialogut politik mes forcave politike për zgjidhjen e krizës poltike në vend.
Duhet të theksojmë që mbrëmjen e djeshme Nishani në emisionin “Arena” në “Ora News” deklaroi se ka nisur një iniciativë për të ulur palët në parlament.
“Është e vërtetë që kam marrë një iniciativë kontakti për të diskutuar në parim me aktorët kryesor politikë në vend duke i vënë në gatishmëri institucionin e Presidentit për të lehtësuar komunikimin e palëve. Kjo ofertë ka qenë për të marrë një miratim në parim midis palëve. Kam gjetur mirëkuptimin dhe gatishmërinë e të gjitha palëve që e pranojnë parimisht angazhimin e Presidentit të Republikës për të ndërmjetësuar le të themi dialogimin dhe komunikimin e palëve, por duhet që të theksoj faktin që Presidenti nuk mundet të angazhohet për të patur një agjendë që ka të bëjë thjesht me rekomandimet teknike të OSBE/ODIHR-t për ndryshimet e Kodit Zgjedhor, sepse rekomandimet e OSBE/ODIHR-t për Kodin Zgjedhor janë adresuar nga një komision parlamentar dhe Presidenti i Republikës do të angazhohet, mund të angazhohet për adresuar krizën politike dhe çështje që lidhen me krizën politike,” tha Nishani. (J.V/Shuplaka)
