Kryeministri Edi Rama e ka nisur fjalën e tij në Kuvend duke folur për Reformën Zgjedhore, dhe përdorimin e teknologjisë në zgjedhje. Rama tha se largimi i opozitës nga Kuvendi solli zvarritjen e procesit, dhe tani nuk ka më kohë që teknologjia të aplikohet në të gjithë vendin në zgjedhjet e ardhshme.
Pjesë nga fjala e Ramës: Që pas zgjedhjeve të 2017 ne kemi kërkuar realizimin e Reformës Zgjedhore, dhe unë e kam thënë që atëherë që nëse duam të përfshijmë elektronikën në zgjedhjet e ardhshme, duhet të ishim angazhuar menjëherë, pasi është një sistem që kërkon kohë për tu vënë në përdorim.
OHDIR nuk ka qenë asnjëherë entuziast për përdorimin e teknologjisë në zgjedhje, për të gjithë kërcënimet që dihen për futjen e saj. Nëse teknologjia futet në zgjedhje ajo duhet që të jetë me faza, dhe jo menjëhëerë, që tiu jepnim mundësi të gjithë njerëzve që të kishin në dispozicion dhe teknologjinë.
Prandaj kemi angazhuar një proces të tërë edhe të eksperimentimin të teknologjisë, duke krijuar në selinë e PS-së qendra votimi, për të parë reagimin e shtresave të ndryshme në raport me teknologjinë. Dhe e gjithë puna e bërë na ka treguar se futja e teknologjisë ofline, është e mundur, dhe mund të sjellë lehtësira jo të vogla në raport me nevojat që ne kemi. Kërkuam që kjo të fillonte me zgjedhjet lokale të 2019-tës me një projekt pilot në një apo dy zona, dhe më pas të nxirrnim konkluzione, që më pas të bënim shtrirjen e tij në të gjithë vendin.
Kjo nuk ndodhi për shkak se axhenda ishte dhe është tjetër e opozitës, koha vrapoi, dhe siç ndodh zakonisht kur ne jemi në metrat e fundit të marrjes së një vendimi të rëndësishëm në BE, dhe ka një të mirë, që edhe pse ne mund ti gjenim votat në këtë Kuvend, pa pritur asnjë lloj autorizimi nga ana që braktisën Kuvendin, ne nuk e bëmë këtë, duke shtyrë më shumë se një herë afatet.
Në çdo vend nuk ndodh që mazhoranca që ka votat në Kuvend ta bëjë Reformën me konsensus, Greqia ndryshoi një sistem të gjithë pa pyetur fare opozitën.
Opozita këtu përdori qarqe të caktuara në Bundestag, që të fuste konsensusin me opozitën si një kusht për Reformën Zgjedhore. Kushti ka qenë i qartë që askush të mos e marrë peng Reformën Zgjedhore, dhe u tha se ajo duhet që të jetë sipas rekomandimeve të OSBE-Ohdir, dhe të votohej në Kuvend, edhe pse ata të tjerët ishin larguar nga Kuvendi.
Reforma ishte gati që në fundin e vitit të kaluar, pas një pune të madh të bërë nga ekspertët tanë, por edhe pse i kishim votat ne preferuam që të presim. Vazhdoi puna dhe ne vendosëm një afat të ri që ishte 31 Maji, që nuk solli rezultat. Më vjen shumë keq mua personalisht, që në vitin 2020 ka ende nevojë që ambasadorët tëhyjnë në mes dhe të bëjnë përkthyesin shqip-shqip, kjo mjafton për të treguar stadin adoleshent që ka politika shqiptare, dhe për liderë që nuk kanë kurajo, që gjërat që kanë interes të përbashkët për vendin të bëhen jashtë interesave partiakë.
Është një fatkeqësi që tregon shumë fare, dhe nuk i kam kërkuar unë ambasadorët, por duke qenë se të tjerët e kishin të pamundur që të uleshin në tavolinë mes shqiptarëve, unë u jam mirënjohës ambasadorëve që kanë dalë nga mandati i tyre, duke qenë se e shohin si po luhet ping pongu shqiptar. Mbetet me vlerë që së paku diskutimet bëhen me dëshmitarë, dhe kur të tjerët marrin emaile dhe sms të pafundme gjysmë gënjeshtrash nga selia e opozitës këtu, në selitë më të larta, të paktën të kenë mundësinë që ta verifikojnë burimin duke folur me përfaqësuesit e tyre. (E.K/Faxweb.al)
