Portieri i Kombëtares Shqiptare Tomas Strakosha duket se ka një mundësi të mirë këtë vit për të luajtur në kohë të plotë te skuadra e tij e Lacios. Pas dëmtimit të Marketit atij ju besua porta e lacialëve dhe sipas parashikimeve do të zgjasë deri në fund të sezonit.
Federiko Marketit i është përsëritur dëmtimi në gju. Sipas mediave italiane, portieri i parë i Lacios vazhdon të ndjejë shqetësime dhe aktualisht, stafi mjekësor po e këshillon që ai t’i nënshtrohet operacionit.
Përsëritja e vazhdueshme e dëmtimit në gjurin e djathtë e ka kthyer problemin e 34-vjeçarit në kronik dhe rrezikon që të dëmtojë ndjeshëm karrierën e tij në vazhdim. Ndaj ndërhyrja kirurgjikale mund ta ndihmojë për të zgjidhur këtë problem dhe për të qenë në 100% në fillimin e sezonit të ardhshëm.
Ndërsa Marketi po mendohet për të ardhmen, Strakosha duket se ka të sigurt të paktën edhe për 2-3 javë të tjera vendin e titullarit në portën e Lacios. Megjithatë, përtej Adriatikut parashikojnë që në fund, Marketi të vendosë t’i nënshtrohet kësaj ndërhyrjeje dhe që Strakoshës t’i besohet porta e Lacios deri në mbyllje të sezonit, në Serinë A si dhe finalen e Kupës së Italisë.
Ky është një lajm i mirë edhe për Kombëtaren shqiptare të futbollit, e cila luan në qershor një sfidë shumë të rëndësishme për objektivat e saj, ndaj Izraelit. Strakosha është tani zëvendësi i parë i Berishës dhe pritet të luajë nga minuat e parë në atë sfidë, ndaj aktivizimi i rregullt me Lacion do ta sillte drejt kësaj sfide në formën më optimale. (E.K/SHUPLAKA)
