Mazhoranca parlamentare, PS dhe LSI, kanë kaluar në Komisionin Parlamentar të Ekonomisë, akcizën e re për gazin e lëngshëm që përdoret për automjetet.
Edhe pse Lëvizja Socialiste për Integrim kishte shprehur më parë kundërshtinë e saj për këtë projekt-ligj, sot ka votuar përkrah deputetëve socialistë në komision, ndërsa opozita e ka bojkotuar mbledhjen.
Nëse më parë, projekt-ligji fliste për një rritje me 13 lekë/litër, është rënë dakord që rritja të jetë me vetëm 8 lëkë/litër.
“Personalisht nuk do e votoja as 5 lekë as 9 lekë. Ne ishim për heqjen fare të kësaj akcize, por meqenëse jemi të kompromisit e diskutuam me ministrin dhe ramë dakord të ngelet 8 lekë për litër”, u shpreh pas mbledhjes deputeti i LSI-së, Përparim Spahiu.
Kreu i Grupit Parlamentar të LSI-së, Petrit Vasili, rreth dy javë më parë, depozitoi në Kuvend një amendament për të hequr pjesën e projektligjit që rrit çmimin e gazit me 13 lekë për litër.
”Rritja me 13 l/litër ose më thjesht akoma një rritje me më shumë se 25% të çmimit aktual, do t’i rëndonte së tepërmi buxhetet e këtyre sipërmarrësve, të cilëve u ka kushtuar jo pak instalimi i impianteve të gazit të lëngshëm, modernë e të sigurt, duke e përllogaritur si zgjidhjen më të mirë edhe sepse gazi i lëngshëm nuk përfshihej në mallrat e akcizës.”, shprehej Vasili.
http://faxnews.wpengine.com/lsi-kunder-qeverise-per-gazin-te-mos-rritet-cmimi-rritja-me-13-leke-per-liter-rendon-sipermarresit/
Discussion about this post