Nga Prof.Ass. Dr.Adem Hyseni
Njeriu i duhur
Në një ditë shtatori të para 4-5 vjetëve, në anën tjetër të telefonit më prezantohet një numër i parregjistruar në celularin tim.
“Jam Maksim Kona – më thotë. Dikush më ka rekomanduar për të diskutuar diçka teknike me ju, për gjeologjinë më konkretisht ….”.
E falenderova natyrisht dhe lamë takim të nesërmen në Durrës …. E aty, para filxhanit të kafes tek dy “kullat binjake” siç themi ne në Durrës, fill pas përshëndetjeve të rastit, por me afinitetet sikur të kishte njohje të vjetër mes nesh, mysafiri u fut drejt e në temë.
Biseda u shtjellua rreth ideve dhe planeve që Maksi kishte grumbulluar gjatë kohës së emigracionit, atje në Itali ku edhe ishte atashuar ato kohë pranë një zyre urbanistike italiane… Preokupimi, njohuritë dhe vizioni i tij, shprehnin qartazi kulturë profesionale, preokupim dhe një këndvështrim të lidhur kryesisht me qytetin e tij të lindjes, Kavajën…
Donte të dinte dhe të plotësonte sa më shumë ato çka ndjente ende mangët nga sa kishte akumuluar gjatë kësaj kohe. Gjithçka që skicohej në letër gjatë bisedës atje, me filxhanin e kafesë përpara, për bregdetin Karpen – Shkumbin dhe cekinen detare karshi, për dinamikën e ndryshimeve në kohë të shtratit të Genusus-it të dikurshëm (Shkumbinit), për gjeologjinë e fushës së Kavajës dhe sidomos asaj kodrinore Kavajë – Tiranë, për Maksin shfaqnin interes të dukshëm.
Ajo që më la mbresa të veçanta në këtë takim të parë, ishte njohja dhe kultura profesionale e inxhinier Maksit dhe sidomos, interesi e lidhja e tij me vendlindjen, “Kavajës së dashur” – sikundër e përmendte shpesh…. Dhe sërish, në ecuri të bisedës para filxhanit të kafes dhe hartës gjeologjike të rajonit, Maksi shkëputet për një moment dhe pak i menduar e më shumë se pyetje, shpreh interesin për një dalje direkte në det të tiranasve, në Karpen në këtë rast, përmes nje tuneli….
“Ide fantastike, interesante, lëvizin në mendjen e këtij njeriu” – mendova për një çast, duke shprehur njëkohësisht në vetvete admirim…… Më pas ndërtuam edhe një program-pune me Maksin dhe kolegun tim A. Beqiraj, me paraprirje për një takim më të gjerë në Tiranë me specialistë të fushave të ndryshme e pjesëmarrje edhe të autoriteteve të studios prestigjioze milaneze, ku Maksimi ishte dakordësuar me ta…
Më tej gjërat rrodhën ndryshe, siç ndodh shpesh këtu tek ne. Po ajo që më ngeli në mendje dhe më shtyu të hedh këto rreshta, është padyshim njohja me Maksim Konën, këtë të ri intelektual kavajas, temperamenti, dashuria dhe interesimi i tij për të vënë në shërbim të vendlindjes njohuritë dhe potencialin profesional të përfituar në vitet e emigracionit.
Pa dyshim, Kavaja ka edhe mjaft specialistë e intelektualë të tjerë vizionarë e të përkushtuar për vendin e tyre, po unë këtë pata fat të njoh, dhe për mbresat që më ka lënë dhe qëllimin më të mirë të kësaj njohjeje rastësore, mendova t’ua transmetoj edhe juve qytetarë kavajas.
Kësi njerëzish të përkushtuar dhe vizionarë, intelektualë të mirëfilltë i duhen sot këtij vendi, aq më tepër pushtetit vendor. I duhen Kavajës dhe qytetarëve të saj. Votojeni Maksim Konën dhe siglën e nderuar LSI që i përket, pasi jam i bindur që ju ofrohet zgjedhja e duhur.
