Pas masakrës së ndodhur ditën e sotme në fashtin Shëlli të Matit, ku Kujtim Koxha, hapi zjarr ndaj punonjësve të bashkisë duke vrarë 3 prej tyre dhe plagosur një tjetër, ndërsa këta të fundit po hanin drekë, ka reaguar edhe kryedemokrati Lulzim Basha.
Me anë të një postimi në rrjetet sociale, Basha shprehet: “Një ngjarje e tmerrshme ka goditur sot Matin dhe ka trazuar shpirtin e çdo shqiptari. Tre punonjës të bashkisë që po punonin për ndërtimin e një rruge janë vrarë barbarisht me bukë në gojë në fshatin Shëlli.
Në këto momente të vështira jam pranë familjeve të Mentor Hoxhës, Hamit Buçit dhe Erzen Alijës dhe lus Zotin që tua lehtësoj sado pak dhimbjen
Po ashtu i uroj shërim të shpejtë të plagosurit Astrit Hani.”
Në përfundim të reagimit të tij, Basha ka fajësuar qeverinë, ndërsa shkruan: “Ngjarja e sotme është një tjetër dëshmi e përgjakshme e degradimit total të shtetit, e pasigurisë që mbretëron ngado dhe e guximit të banditëve të veshur me pushtet për të kryer një masakër të tillë.”
Kujtojmë se autori i kësaj ngjarjeje Kujtim Koxha u arrit që të kapej nga Policia pas një sërë kërkimesh në zonë, Ai mësohet se ka qenë kryeplak i fshatit Shëlli, ku ndodhi dhe ngjarja, njëherësh kryetar i Partisë Socialiste të fshatit Shëlli.
(B.B/ Faxweb.al)
