Gjatë këtyre ditëve, katër senatorë amerikanë kanë vizituar Shqipërinë, ku veç takimit me krerët e politikës shqiptare kanë takuar edhe lideren e opozitës iraniane, Mary-am Rajavi që drejton Këshillin Kombëtar të Rezistencës së Iranit (KKRI).
Lajmi është pasqyruar gjerësisht nga “Huffington Post”, sipas së cilës, senatorët Roy Blunt, John Cornyn dhe Thom Tillis kanë takuar edhe anëtarë të organizatës së popullit muxhahedin të Iranit në Tiranë.
Mirëpo Këshilli Kombëtar i Rezistencës është një koalicion politik që kërkon ndryshim regjimi në Iran dhe konsiderohet si kërcënimi kryesor për mullahët e Teheranit.
Liderja e opozitës iraniane i ka falënderuar senatorët për ndihmën që kanë dhënë ShBA-të për zhvendosjen e sigurt të këtij grupimi në Tiranë.
Po ashtu “Huff Post” shton se Maryam Rajavi shprehu mirënjohje për përpjekjet e Senatit amerikan, veçanërisht senatorit Blunt, lidhur me mbrojtjen e mijëra anëtarëve të MEK-ut në kampin “Liberty”, Irak, dhe zhvendosjen e tyre të sigurt në Shqipëri.
Delegacioni i Senatit u takua edhe me një numër anëtarësh të MEK-ut, si dhe me dëshmitarë dhe viktima të mizorive të regjimit iranian në Iran dhe kampeve “Ashraf” dhe “Lirisë”.
Kjo vizitë e senatorëve amerikanë në Shqipëri, vjen në një kohë kur Uashingtoni ka vendosur sanksione të reja mbi Iranin, për mbështetjen nga ana e tij të terrorizmit dhe shkeljen e të drejtave të njeriut.
Mirëpo sipas mediave ndërkombëtare, ky takim mes senatorëve amerikanë dhe lideres së opozitës iraniane në Shqipëri, është një mesazh për Teheranin se opozita po fiton terren. (D.D/Shuplaka)
[ngg_images source=”galleries” container_ids=”2630″ display_type=”photocrati-nextgen_basic_imagebrowser” ajax_pagination=”1″ order_by=”sortorder” order_direction=”ASC” returns=”included” maximum_entity_count=”500″]
