”Mirësevini në Shqipërinë e tritolit dhe plumbave”, kjo është shprehja që të vjen në mend teksa sheh situatën e krimit në këtë fillim janari.
Vetëm në tre ditë, nga e shtuna në të hënë, në vendin tonë kanë vdekur në shpërthime dhe në vrasje tre persona ndërsa janë plagosur 9 të tjerë.
Situata e krimit të organizuar në vendin tonë është shfaqur përherë problematike, pavarësisht aksioneve të ndërmarra nga ana e autoriteve.
Së fundi nisma e ndërmarrë nga ana e Ministrisë së Brendshme, operacioni ‘’Forca e Ligjit” ende nuk i ka treguar muskujt në arrestimin e të fortëve.
Gjithçka nisi në Shkodër, ku në një shpërthim në lagjen ‘’Rus” mbetën të plagosur 8 persona. Objektiv i atentatit ishte shtetasi Lulzim Kulla me precedent të mëparshëm penalë.
Gjendja e tij shëndetësore paraqitet e rënduar, ndërsa disa prej të plagosurve të tjerë, kalimtarë të rastit kanë marrë dëmtime më të pakta.
Po ashtu mbrëmjen e së shtunës një sasi tritoli iu vendos një biznesi në Fushë-Krujë, i cili kishte qenë objektiv i një sulmi të ngjashëm edhe një muaj më parë, në datën 8 Dhjetor. Fatmirësisht përveç dëmeve materiale, shpërthimi nuk ka pasur pasoja në njerëz.
Ndërkohë të dielën pasdite në një nga zonat më të populluara të kryeqytetit, në zonën pranë ‘’21 Dhjetorit” një 32-vjeçar mbeti i vrarë nga një atentat me armë, ndërsa miku i tij mbeti i plagosur.
Boçi ishte me precedentë të mëparshëm penalë, teksa në 2010 kishte plagosur një person.
Rasti më i fundit ishte dje në Vlorë ku dy të rinj mbetën të vrarë, pas një konflikti të çastit.
Mariglen Mema, babai i dy fëmijëve, mbeti i vrarë nga ana e breshërisë së plumbave të goditur nga ana e Artion Shenaj. Më pas Shenaj u largua për në banesën e xhaxhait të tij ku vrau edhe veten.
Është vërtet shqetësuese sesi në vendin tonë lehtësia e atentateve të tilla bëhet e zakonshme, dhe sesi në kaq pak ditë bilanci paraqitet i tillë.
Për të mos llogaritur grabitjet që ndodhin në mes të ditës, në ‘’Hipotekën” e Tiranës. (E.K/FAXWEB)
