Kreu i Grupit Parlamentar të LSI-së Petrit Vasili, ka vijuar akuzat ndaj kryeministrit Edi Rama për kapjen e drejtësisë. Vasili tha se qeveria po përdor të njëjtën logjikë si me çështjen “Tahiri” për të ndërtuar një mburojë për çështjet e veta korruptive.
“Sot PS kërkon të ndërtojë një mburojë për çdo çështje korruptive që vjen në parlament për pushtetarët e saj, në mënyrë që drejtësia të mos funksionojë mbi ta. Është e qartë që këto ndryshime rregulloreje janë vetëm për marrjen e masave mbrojtëse nga PS në vijim të logjikës për çështjen e ish-ministrit Saimir Tahiri, ku PS u bë bllok për të ndaluar hetimin e prokurorisë dhe ndalimin e arrestimit të tij. Sot PS kërkon të ndërtojë një mburojë për çdo çështje korruptive që vjen në parlament për pushtetarët e saj, në mënyrë që drejtësia të mos funksionojë mbi ta. Trumbetimi i disa viteve me radhë, duke filluar nga kryeministri e te ministrat e tjerë, shqiptarët e kanë të qartë se kush ka frikë.
Ata kanë frikë për aferat e tyre korruptive. Le t’i hapet rruga drejtësisë të hetojë deri në fund për trafiqet kriminale. Nuk mund të ketë pengesë hetimi. “, tha Vasili.
Sjellim në vëmendje që ditën e djeshme grupi parlamentar socialist i ka paraqitur kryetarit të Parlamentit, Gramoz Ruçi, disa propozime për ndryshimin e rregullores.
Ajo që ra në sy janë ndryshimet në rastin e një kërkesë të Prokurorisë për arrestimin e një deputeti. Nëse shohim rregulloren aktuale, sot Prokuroria mjafton të dërgojë në Kuvend një kërkesë dhe dokumentet shoqëruese.
Nga ana tjetër propozimet e socialistëve fusin shprehimisht termin prova. Pra, Prokuroria duhet ta dorëzojë relacionin e arsyetuar, të shoqëruar me prova, duke nënkuptuar rolin e Kuvendit si një rol Gjykate. (J.V/Faxweb)
Discussion about this post