Jo më larg se mbrëmjen e djeshme qyteti i Fierit u trondit nga një atentat mafioz në një nga lagjet më të populluara të tij. Objektivi i këtij atentati ishte Ervin Memo, 38-vjeç një ish-emigrant në Greqi, që tashmë merrej me vreshtari në një fshat pak kilometra larg qendrës së Fierit.
Deri më tani e vetmja pistë që ka dalë në media është ajo e konflikteve për pronën. E megjithatë nga Policia ende nuk ka një deklaratë zyrtare në lidhje me shkaqet që kanë çuar në këtë atentat të rëndë, dhe as me personat e dyshuar.
Ky atentat në Fier vjen vetëm dy ditë pas vizitës së qeverisë Rama në këtë qytet, nga ku ministri i Brendshëm Fatmir Xhafaj u shpreh se grupet kriminale ishin identifikuar dhe tashmë mbetej vetëm goditja finale e tyre.
‘’Sot që po flasim në shkallë vendi ne kemi goditur 7 grupe të tilla kriminale si dhe për një pjesë të konsiderueshme të tyre kemi nisur hetimin pasuror të grupeve kriminale.
Ky është një problem që nuk është vetëm në disa pjesë të territorit sigurisht, por në Fier dhe Lushnje gjithashtu ka disa probleme të kësaj natyre. Ka disa element, ka disa individë, por edhe grupe kriminale të cilët kanë guxuar të përballen jo në pak raste edhe me policinë.
Ne jemi të angazhuar fort sëbashku me Prokurorinë në një proces hetimi ndaj këtyre grupeve kriminale. Kemi goditur disa prej tyre dhe shumë shpejt do të shikoni rezultate konkrete edhe në Fier edhe në Lushnje ku ka pasur edhe ka dukuri të kësaj natyre’’, u shpreh Xhafaj dy ditë më parë.
Nuk dihet nëse ministri Xhafaj në deklaratën e tij i referohej dhe grupeve kriminale të minave me telekomandë, që për pak sa nuk i morën jetën të riut në Fier.
Kjo nuk është e para deklaratë e këtij lloji që bëhet nga ana e Xhafajt që kur ka nisur operacioni ‘’Forca e Ligjit”, e megjithatë në shumë qytete të vendit nuk kanë munguar sërish aktet e rënda kriminale.
Kujtojmë se vetëm në Fier qytetari Agur Vrenozi u vra për shkak se ndërhyu për të ndaluar grabitjen e një biznesi, një 20-vjeçar u vra në tentativë grabitjeje nga ana e Policisë, dhe miku i tij u plagos, apo rasti kur një breshëri plumbash u shkrep në drejtim të lokalit të një personi me precedentë të rrezikshëm penal, për të mos përmendur dhjetra ngjarje të tjera në të gjithë vendin.
Në kohën kur Policia dhe Ministria e Brendshme raportojnë skedulimet e grupeve kriminale, vetë krimnelët vazhdojnë ‘’punën” e tyre, duke shkaktuar jo pak herë viktima, tmerr dhe terror.
(E.K/Faxweb.al)
https://www.youtube.com/watch?v=F6Xuw9oRVxM
Discussion about this post