Kjo e mëposhtmja është një nga ato historitë që të mbushin me inat, po njëherësh edhe me frymëzim. Një moshuar tregon se gjithë kursimet e jetës i ka investuar në një dyqan mishi, ndërsa vetëm dy vite më pas ka falimentuar.
Tashmë ai shet në rrugë dhe thotë se nuk e mendonte kurrë se kur të shkonte në moshën 80-vjeçare, do të shiste në rrugë në ditë me shi dhe diell.
“Gjithë kursimet e jetës i investova në një dyqan mishi. Mendova se vuajtjet e mia do merrnin fund. Por jo, pas 2 vjetësh falimentova dhe bashkë me dyqanin ikën dhe kursimet e jetës. Nuk e mendoja kur isha i ri se kur të isha 80 vjeç do isha duke shitur në rrugë në një ditë me shi. Por papunësia dhe fukarallëku të detyrojnë. Jam vet i katërt në shtëpi dhe me një pension nuk ia dalim dot.
Të paktën këtu shes pa u shqetësuar, si në çdo shitës ambulant, policët bashkiakë, sillen shumë mirë, nuk vënë kurrë një gjobë, më pyesin nëse jam lodhur apo mërzitur, buzagaz madje më thonë të iki në shtëpi e të çlodhem se ma ruajnë ata mallin, por unë nuk i lë se më vjen keq për ta, mundohen gjithë ditën e nuk dua t’iu bëhem barrë.
Nuk e di se dhe sa vite do jetoj, por sa të kem jetë, në këtë cep të rrugës do jem, me shpresën se dikush do blejë diçka”, thotë i moshauri në rrëfimin e tij.
(E.K/FAXWEB)
Discussion about this post