Projekti “Veliera” duket se nuk ka ndërmend të ndalet, duke qenë se së fundmi në kuadër të saj nuk është kursyer as monumenti i njohur në Durrës, ai i Mujo Ulqinakut, i vendosur pranë Torrës mesjetare të Durrësit.
Referuar “Reporter.al”, një ditë më parë nisën punimet për zhvendosjen e këtij monumenti identifikues të ngritur në nderim të heroit të rezidencës antifashiste, vepër e skulptorit Kristaq Rama, babait të kryeministrit Edi Rama.
Heqja e këtij monumenti vjen pas heqjes së shtatë veprave që janë larguar nga sheshi brenda disa muajsh. Ndër veprat e larguara për shkak të projektit me vlerë 6 milionë USD përmendim bustet e Ismail Qemalit dhe Dom Nikoll Kaçorrit, kryetari dhe nënkryetari i parë i qeverisë së Pavarësisë, të cilët u sakrifikuan të parët dhe u dërguan në ruajtje në një nga magazinat e qytetit.
Ato u ndoqën nga heqja e skulpturave të John Lennon, Tina Turner, Bob Dylan, etj. Ndërkaq nuk dihet adresa e tyre dhe e monumentit të Mujo Ulqinakut. Siç u mësua nga zbulimet arkeologjike të kryera këtë fillimvit pranë “Velierës”, të tre topat pranë monumentit trekëndor i përkasin një grupi artilerie bregdetare, të instaluar 200 vjet më parë në fortifikimin osman pranë hyrjes së portit.
(XH.A/SHUPLAKA)
