“Papunësia dhe varfëria më detyruan”. Kështu ka deklaruar para policisë një 19-vjeçar nga Tirana pasi tentoi të kalonte kufirin shqiptar nëpërmjet detit në mënyrë të paligjshme.
Ilirjan Riza Korbi, lindur në Kamëz e banues në lagjen “Kushtrimi” në Vlorë u kap të martën nga skafi i policisë kufitare në ujërat neutrale shqiptaro-greke, pikërisht në vendin e quajtur “Mezokanal”. Me një varkë-kamerdare të vogël, të ngarkuar dhe me ushqime e ujë, ai ishte nisur nga Ksamili për të shkuar ilegalisht në Korfuz.
Siç tha për grupin hetimor, ai ishte nisur me autobus nga Vlora për në Sarandë e më pas kishte shkuar në Ksamil ku kishte fryrë kamerdaren dhe e kishte hedhur në ujë për të shkuar në Korfuz. (J.V/Shuplaka)
