Ish Kryetari i Vetëvendosjes në Kosovë, Albin Kurti, ka deklaruar se e njeh dhe e respekton Republikën e Kosovës.
Në hapjen zyrtare të fushatës zgjedhore, Albin Kurti u ka thënë qytetarëve që kishin mbushur sallën, se Vetëvendosje e njeh shtetin e Kosovës, e respekton dhe e do atë, njofton Klan Kosova.
Këtë deklaratë Kurti e bën vetëm 10 ditë para zgjedhjeve të cilat do të mbahen në datën 11 qershor.
Analistët e kanë mirëpritur këtë deklaratë të ish kryetarit të VV-së duke thënë që kjo është një gjë mjaft pozitive për Kosovën por edhe për Vetëvendosjen sepse i heq nga nga dora një akuzë kundërshtarëve politikë.
Partitë kundërshtare e kanë akuzuar VV-në se është një parti destruktive dhe e dëmshme për Kosovën për shkak të qëndrimit kundër republikës dhe përplasjes së fortë me ndërkombëtarët.
Disa nga opinionet e analistëve në Kosovë pas deklaratës së Albin Kurtit:
Një deklaratë e tillë e Kurtit po shihet si njohje e re e shtetit të Kosovës, nga analisti Gazmend Syla, i cili rëndit Vetëvendosjen si njohës të shtetësisë së vendit.
”Deklarata e Albinit vjen si njohje e 115 ose 116 pas Senegalit apo kush ka qenë”, shprehet Syla.
Ndërkaq analisti Artan Muhaxhiri, thotë se kjo është një deklaratë pozitive për Vetëvendosjen pasi u ka dhënë një sinjal të tjerëve që të mos keqpërdoret ky subjekt partiak për përfitime politike.
”Më vjen mirë për zotin Kurti që e vulosi këtë sepse të tjerët e keqpërdornin. Është një gjë e mirë për mospërdorimin e Vetëvendosjes”.
Deklaratën e fundit të Kurtit që e bëri në hapjen e fushatës zgjedhore pikërisht në qytetin e Gjilanit, po e cilëson ndryshim, analistja Luljeta Aliu, e cila në Analiza Zgjedhore të Baton Haxhiut tha se Vetëvendosje vazhdimisht po ndryshon.
”Ky është ndryshim, secili nuk ndryshon nuk stagnon. Është shumë në rregull kjo. Mustafa që tha bashkëqeverisje, ka një njollë që shumë vështirë ka me pas LDK për më tutje. Veseli iu referua Vetëvendosjes për atë ”mosnjohjen e shtetit”, tha ajo. (B.H/Shuplaka)
Discussion about this post