Një tjetër incident i përgjakshëm, pas Sri Lankës, ka shënuar sërish festën e Pashkëve këto prill.
Një 19-vjeçar i identifikuar si John Earnest, ka hapur zjarr në një sinagogë të Kalifornisë gjatë së shtunës, duke shkaktuar një viktimë dhe tre të plagosur.
Sipas mediave ndërkombëtare,në sinagogë po kremtohej mesha e Pashkës, në momentin kur agresori i armatosur kreu aktin ekstrem.
19 vjeçari është arrestuar në veri të qytetit të San Diegos, ndërkohë që policia ende nuk ka dhënë një motiv të ngjarjes. Për sulmin ka reaguar edhe presidenti amerikan Donald Trump, i cili e ka cilësuar sulmin si “një krim urrejtjeje”.
Burime nga policia në San Diego bënë me dije për mediat e huaja se, hetuesit janë duke rishikuar mediat sociale të të dyshuarit, si dhe po ekzaminojnë edhe një “letër të hapur” antisemite të publikuar “online”, për të zbuluar nëse bëhet fjalë për sulm terrorist apo jo.
Në letrën e hapur, të publikuar në një forum online disa orë përpara sulmit, autori thoshte se ishte frymëzuar nga sulmi në dy xhamitë e Christchurchit të muajit të kaluar, e po ashtu edhe nga të shtënat vdekjeprurëse në sinagogën “Pema e jetës” në Pittsburg.
Sulmi në San Diego vjen ekzaktësisht 6 muaj pas të shtënave në Pittsburg, në tetor të vitit 2018, kur mbetën të vdekur 11 persona, në atë që u konsiderua asokohe si sulmi më i rëndë antisemit në historinë e viteve të fundit të Shteteve të Bashkuara, dhe pak kohë pas sulmit në xhamitë e Zelandës së Re.
Discussion about this post