Përfundon takimi i Bashës me ambasadorët: Diskutuam për situatën politike dhe krizën e krijuar në vend

Kreu i opozitës Lulzim Basha ka zhvilluar një drekë me ambasadorët e Bashkimit Europian në një restorant në qendër të Tiranës, ndërsa në fokus të takimit ka qenë diskutimi mbi situatën politike në vend.

Sapo ka përfunuar kjo drekë dhe Basha u shpreh se u diskutua për situatën politike në vend dhe krizën ku është futur vendi. “Kemi mbështetjen e të gjithë aleatëve dhe  partnerëve ndërkombëtar”, u shpreh Basha. Ne jemi në bashkëbisedim të vazhdueshëm me partnerët, aleatët tanë europianë dhe amerikanë. Ky ishte një takim, një drekë pune në kuadrin e bashkëbisedimit dhe bashkëpunimit të vazhdueshëm dhe të frytshëm të opozitës së bashkuar me aleatët dhe partnerët tanë europianë. Diskutuam zhvillimet politike dhe rrugëdaljen nga kriza politike ku e ka futur vendin pamundësia e zgjedhjeve të lira dhe të ndershme me një qeveri të bërë njësh me krimin dhe drogën”, tha Basha.

Duhet të sjellim në vëmendje që kryeministri Edi Rama sot bëri publike dhe emrat e 4 ministrave të rinj, pas shkarkimit të Saimir Tahirit nga Ministria e Brendshme, Blendi Klosit, Ilir Beqajt dhe Bledi Çuçit. (J.V/Shuplaka)