Plagosja me armë në qendër të Burrelit, policia arreston 2 persona, 5 të tjerë në kërkim

Policia ka zbardhur  ngjarjen e ndodhur mbrëmjen e djeshme, ku mbeti i plagosur me armë zjarri 33-vjeçari Aldo Dedja, në qendër të qytetit Burrelit dhe arreston dy autorët.

Duke sqaruar ngjarjen policia bën me dije se gjithçka ndodhi mbrëmë rreth orës 21.00, pasi është marrë njoftim se në lagjen Partizani Burel, para një lokali ka ndodhur një konflikt fizik midis disa personave.

Menjëherë kanë shkuar forca të shumta policore në vendin e ngjarjes ku kanë konstatuar se para lokalit të shtetasit Astrit Suçi, në qytetin e Burrelit, gjatë një konflikti fizik mes disa personave, janë përdorur edhe armë zjarri, ku për pasojë ka mbetur i plagosur shtetasi :

Aldo (Akil) Dedja, 33 vjeç, banues në Burrel (i cili ndodhet jashtë rrezikut për jetën).

Grupi hetimor në vendngjarje ka gjetur dhe sekuestruar 7 copë gëzhoja arme zjarri pistoletë model 56.

Falë veprimeve të shpejta dhe profesionale në përfundim të veprimeve të para hetimore të kryera nga Specialistët për Hetimin e Krimit në Komisariatin e Policisë Burrel u bë arrestimi në flagrancë i shtetasëve:

Aldo (Akil) Dedja, 33 vjeç, banues në Burrel.

Arrestimi i tij u bë pasi është përfshirë në konfliktin ku mbeti i plagosur dhe nuk ka pranuar të kallëzojë krimin para policisë gjyqësore. Vepra penale “Moskallzim krimi”.

Astrit Suçi, 54 vjeç, banues në Burrel.

Arrestimi i tij u bë pasi, gjatë kontrollit të ushtruar nga shërbimet e policisë Mat, në një ambjent në pronësi të tij është gjetur një sasi prej 140 gramë lëndë bimore e dyshuar canabis sattiva, 1 kapsollë detonatore dhe 100 cm fitil zjarr përcjellës. Vepra penale “Prodhim dhe shtije të lëndëve narkotike”, “Mbajtje pa leje të armëve dhe municioneve luftarake”.

Gjithashtu u shpallën në kërkim shtetasit:

K.S, 18 vjeç, banues në Burrel, për veprën penale “Vrasje e mbetur në tentativë”, “Armëmbajtje pa leje”, “Prishje e qetësisë publike”, e kryer në bashkëpunim.

D.S, 23 vjeç, banues në Burrel, për veprën penale “Armëmbajtje pa leje”, “Prishje e qetësisë publike”, e kryer në bashkëpunim.

E.P, 30 vjeç, banues në Burrel, për veprën penale “Armëmbajtje pa leje”, “Prishje e qetësisë publike”, “Plagosje e lehtë”, “Rrëmbim personi e mbetur në tentativë”.

A.K, 40 vjeç, banues në Burrel, për veprën penale “Armëmbajtje pa leje”, “Prishje e qetësisë publike”, “Plagosje e lehtë”, “Rrëmbim personi e mbetur në tentativë”.
(E.P dhe A.K, kanë tentuar të marrin me forcë shtetasin E.P, 22 vjeç).

E.P, 22 vjeç, banues në Burrel, për veprën penale “Armëmbajtje pa leje”, “Prishje e qetësisë publike”.

Matetialet hetimore i kaluan Prokurorisë Rrethit Gjyqësor Mat për veprime të mëtejshme.

(J.V/Shuplaka)