Një i ri rom është dhunuar nga Policia Bashkiake e Tiranës pasi si çdo ditë po mblidhte mbetjet e riciklueshme për të siguruar bukën e gojës.
Sipas tij, policia bashkiake e dhunoi derisa e la pa ndienja, ndërsa më pas i mori mallin që kishte grumbulluar.
Lidhur me këtë situatë ka reaguar komuniteti rom dhe egjiptian në kryeqytet, ka protestuar sot përpara Bashkisë së Tiranës ndaj nismës së re për diferencimin e mbetjeve në burim. Mbyllja e koshave të plehrave u ka hequr të vetmen mundësi mbijetese mijëra familjeve në Tiranë.
Mbledhësit e mbetjeve të riciklueshme tregojnë se pas vendosjes së koshave të rinj policia bashkiake ka nisur një aksion për sekuestrimin e karrocave dhe gjobitjen e tyre me 50 mijë lekë të vjetra.
Në pankartat që mbanin në duar shkruhej: “Mos na ndaloni bukën tonë të përditshme”, “Ofro mundësi të tjera punësimi, na trajtoni të barabartë”, “Mos na i mbyll kazanët se vdesim”.
“Po na hiqni bukën e gojës. S’kam çfarë t’iu jap fëmijëve për të ngrënë, do t’i çoj atje lart tek Erioni t’i ushqej”, tha një prej protestueseve. (A.R/SHUPLAKA)
