Policia e Shtetit nuk kursen as gazetaren e ‘’Fax News” Mirilda Tili, e cila shtyhet me dhunë teksa ishte duke raportuar ‘’Live”.
Ndërsa ishte duke ndjekur nga afër shqetësimet e naftëtarëve gazetarja e gjen veten të shtyrë nga forcat e shumta të policisë që ndodhen përpara ambjenteve të Ministrisë së Energjitikës.
“Nuk e di çfarë ti vëmë emrin. Nuk e di çtë them, jemi duke u shtyrë të gjithë bashkë, ka konfrotim fizik, forcat e RENEA-s janë bërë të gjithë bashkë dhe po na shtyjnë. Ka një lloj arrogance nga ana e Policisë dhe nuk po na sqarojnë se pse po ndodh kjo”, shprehet gazetarja teksa ishte duke folur në mënyrë direkte.
Prej mëngjesit të sotëm ‘’Fax News” është vendosur pranë naftëtarëve të cilët nuk kanë marrë zgjidhje nga ana e ministrave Gjiknuri dhe Ahmetaj. Televizioni ndoqi edhe dje nga afër peripecitë që hoqën naftëtarët e Fierit dhe Ballshit për të mbërritur në Tiranë.
Tili raporton se ka një numër dyfish të Policisë krahasuar me protestuesit. Ndërkohë që një prej naftëtarëve është shoqëruar me dhunë nga ana e Policisë. Ai është identifikuar si Rexhep Alimetaj.
(E.K/FAXWEB)
