Besim Hajdarmataj, ish-drejtues i Krimeve të Rënda, një prej prokurorëve që në vitet e fundit ka kaluar nëpër duar dosjet më të bujshme në vend dhe njëri prej grupit që u përplas me Arta Markun për dosjen “Shullazi” del këtë të hënë para komisioneve të vettingut.
Hajdarmataj do t’i nënshtrohet kontrollit të tri kritereve, duke filluar që nga pasuria, profesionalizmi dhe pastërtia e figurës.
Komisioni i Pavarur i Kualifikimit ka publikuar kalendarin e punimeve, sipas të cilit të hënën është seanca e parë dëgjimore. Trupa e gjyqtarëve të KPK-së përbëhet nga Brunilda Bekteshi, Roland Ilia dhe Suela Zhegu.
Arta Marku shkarkoi Besim Hajdarmatajn në maj të 2018 nga drejtues të Prokurorisë për Krimet e Rënda. Në këtë periudhë ai kishte njëkohësisht në dorë dosjen “Tahiri”, atë “Shullazi” dhe dosjet “184” dhe “339” për shit-blerjen e votave në Dibër dhe Durrës.
Vjeshtën e 2018, përplasja mes Hajdarmatajt me Donika Prelën mbi pretencën për Emiljano Shullazin kërkoi ndërhyrjen e Arta Markut, që e hoqi Hajdarmatajn nga dosja e bujshme, madje e transferoi atë në Pogradec.
Prokurori i Krimeve të Rënda e kundërshtoi vendimin e Arta Markut si të kundërligjshëm dhe në janar të këtij viti, Këshilli i Lartë i Prokurorisë, me një votim 6 me 5 rrëzoi kryeprokuroren dhe riktheu tek Krimet e Rënda Besim Hajdarmatajn së bashku me Olsian Çelajn. Çelaj është njëkohësisht në garë edhe për postin e kryeprokurorit bashkë me Arta Markun.
Discussion about this post