Politikani opozitar rus, Aleksei Navalny, është arrestuar sot nga policia në qendër të Moskës, në një protestë që ai e kishte thirrur kundër korrupsionit.
Roman Ruibanov, drejtor i fondacionit antikorrupsion të Navalnyt, në rrjetin Tëitter ka konfirmuar se lideri opozitar ishte arrestuar dhe ka postuar video ku shihet turma e mbështetësve të tij në përpjekje për pengimin e lëvizjes së makinës policore me Navalnyn, derisa prania e policisë speciale ishte e madhe.
Disa protestues janë arrestuar.
Navalny u bëri thirrje mbështetësve që ta vazhdojnë tubimin kundër korrupsionit edhe pa praninë e tij.
Dhjetëra vetë janë arrestuar në Sheshin Pushkin, ku ka pasur prani të madhe të policisë, ndërsa një helikopter fluturnote mbi masën e tubuar në këtë protestë, e cila nuk ishte e autorizuar nga autoritetet.
Raportohet se ka pasur edhe arrestime në tubimet e tjera të këtilla në qytetet në gjithë Rusinë.
Këto tubime po bëhen pasi grupi antikorrupsion i Navalny, më 2 mars ka publikuar një raport, në të cilin akuzohet kryeministri i Rusisë, Dmitry Medvedev, se i ka përdorur organizatat humanitare dhe OJQ-të, për të mbledhur donacione nga pasanikët dhe bankat shtetërore, e pastaj këto fonde i ka shfrytëzuar për blerjen e pasurive të shtrenjta.
Demonstrata u mbajtën edhe në Shën Petërsburg, Vladivostok, dhe Tomsk, raporton BBC. Polica ka përdorur gaz lotsjellës për të shpërndarë turmën përveç disa arrestimeve. (M.D/ Shuplaka)
