Kastro Zizo, një nga këngëtarët më të talentuar shqiptarë është përjashtuar nga festivali i fundvitit në Radio-Televizionin Publik Shqiptar, kanalin publik që mbahet me taksat tona.
”Pas shume mesazheve dhe telefonatave po shkruaj nja dy rreshta: Situata e mos pranimit te kenges sime ne festivalin e RTSH nuk duhet perdorur ne asnje menyre politikisht.”, komenton vetë këngëtari lidhur me ngjarjen.
Po çfarë ka ndodhur me të? Pse kënga e tij u përjashtua nga konkurimi?! Nuk dihet se kush është grupi përzgjedhës i këngëve por dihet paraprakisht se festivali do të drejtohet nga Adi Krasta.
Në krye të RTSH-së është Thoma Gëllçi, ish-kryeredaktor i Zërit të Popullit të Partisë Socialiste. Këngëtari Kastro Zizo ka qenë pjesë e Lëvizjes Socialiste për Integrim. A është e gjitha politike?! A po përdor Gëllçi të njëjtën skemë të shefit të tij të madh: Edi Ramës, ”Fshesën” edhe te arti?! Rama që kur mori pushtetin ka nisur ”Fshesën” në administratë duke larguar nga detyra drejtues dhe nëpunës që nuk i përkasin partisë së tij. Javë më parë sulmoi edhe një këngëtar tjetër të talentuar, Klajdi Musabelliun, për të cilin tha publikisht se ka mbajtur vendin e punës kot në Agjencinë Kombëtare të Burimeve Natyrore, si ekspert në Zyrën e Shtypit, ndërkohë që Musabelliu publikoi diplomën e tij për Shkenca Komunikimi.
Vetë këngëtari Kastro Zizo nuk e ka publikuar tekstin e këngës, mbi të cilin është ngritur preteksti nga organizatorët. Teksti është publikuar nga ish-kryeministri Sali Berisha. E gjithë kënga flet për largimet masive nga Shqipëria.
Në listën e publikuar me emrat e këngëtarëve 2 ditë më parë emri i Kastro Zizos nuk figuronte dhe as nuk kishte ndonjë sqarim për ngjarjen. Nga 60 këngë organizatorët thonë se kanë zgjedhur për të interpretuar 22. Emrat e këngëtarëve të përzgjedhur janë: Artemisa Mithi, Boiken Lako, David dhe Genc Tukiçi, Elton Deda, Ergi Bregu, Evans Rama, Eugent Bushpepa, Grupi “Akullthyesit”, Grupi “Lynx” ,Grupi “Na”, InestNeziri, Lorela Sejdini , Manjola Nallbani, Mariza Ikonomi, Orgesa Zaimi, Redon Makashi, Rezarta Smaja e Luis Ejlli , Stefi dhe Endri Prifti, Tahir Gjoci, Voltan Prodani dhe Xhesika Polo. (V.G/Faxweb)
TEKSTI I KËNGËS SË CASTRO ZIZOS
”I huaj…
I përgjumur një mëngjes vere
Lash në tavolinë një letër të ftohtë
Duke mbajtur shtrënguar fort lotët
Me fjalët: M’duhet të iki, nuk rri dot
Pastaj vazhdova me fjalë të tjera
“M’duket se vendi nuk më përket”
Më prisje që në agim tek dera
Me the: ikja jote larg, po më vret!
S’ka kuptim të qëndrojë këtu
Mjaft me mëshirë për njeriun e lirë
Do endem i huaj, diku,
Se Burgun e mjerimit se kam kapërdirë
Më fute në xhepin e ftohtë
Një shami nëne që thotë lamtumirë
Të duhet të jesh e fortë
Se kjo është krenaria e njeriut të lirë
Ika larg teje atë natë
Si një ëngjëll që nuk kishte më krah
Se kështu më thërrisje i vogël
Isha veç një djalosh mama
Tani më sheh me maska
Tek endem i vetëm në mërgim
Me ikjen time të vrava,
E shoh vështirë të ketë më kthim
Këtu është ndryshe nëna ime
Është një parajsë me qiell sterr të zi
Njerëzit qëndrojnë herë pas herë dyshe,
Po mes tyre ka shumë vetmi
Dhe unë gjeta punë, shoqe jete
Gjeta mundesinë për pak ngrohtësi
Por kam shumë mall për rrugët e mjera
Udhëtoj në ëndrra tek shtëpia ku rri ti
Tani kam një djalë të vogël
I kam vënë emrin e vendit tim
Arbër e thërrasin shokët
Dhe ai i huaj këtu në këtë vegim
Mezi sa pres të vij
Të tregoj jetën time të plotë
Do të ishte shumë krenare
Do të gëzoheshe, e heshtur në lotë
Ti me zgjon dreq (djall’), me th’rret të bie, në dëshpërim
Unë i huaj, të ftoj në një vallëzim
Hidhu, kërce me jetën o njeri
Valsin e ëmbël të robërisë
Me shiko me zjarr në sytë e mi
Do të digjesh si njeri i lirë
Eja të ngjitemi në qiell të dy
Si shtegëtarë pa emër në errësirë
Do t’tregojë me mijëra yje që shndrisin si ty
Që nuk shuhen asnjëherë
Jam i ngopur e dashur
20 vjet vallëzova me shpirtin tim
kërceva valsin si xhonglier nate
dhe askush s’e kuptoi që ishte veç një film
Tani më duhet të kthehem tek ty
Ka ardhur koha të të kthej shaminë e ftohtë
Të ecim në pragun e derës të dy
Dhe ti të shpërthesh e lodhur në lotë
Shikoj fytyrën tënde
Dhe eci i ngjathët drejt teje nënë
Më dukesh si atëherë e re
Por sytë e rinisë të kanë lënë
Tani do jemi bashkë
Edhe pse gjumë pranë një shtrati të bardhë
Nuk lëviz më ajri
Dhe lëkura e ngrohtë e duarve të është tharë.
Ti më zgjon djall, me th’rret të bie, në dëshpërim
Unë i huaj, të ftoj në një vallëzim
Hidhu, kërce me jetën o njeri
Valsin e ëmbël të robërisë
Me shiko me zjarr në sytë e mi
Do të digjesh si njeri i lirë
Eja të ngjitemi në qiell të dy
Si shtegëtarë pa emër në errësirë
Do t’tregojë me mijëra yje që shndrisin si ty
Që nuk shuhen asnjëherë
Merre jeten tende tregoje si fëmijë
Merre dhe vallëzimin tonë të kercesh në pafundësi
Mos harro nga vjen, mos harro asnjëherë!
Se i huaji në këtë vënd nuk je ti
Eja të ngjitemi në qiell të dy
Si shtegëtarë pa emër në errësirë
Do t’tregojë me mijëra yje që shndrisin si ty
Që nuk shuhen asnjëherë”
Castro Zizo dhe Thoma Gëllçi
Discussion about this post