Zëvendësoi ministrat dhe zëvendëskryeministren, sipas marrëveshjes me kryedemokratin Basha, por Edi Rama nuk i ka qëndruar marrëveshjes për drejtorët.
Megjithse ende profilet e tyre nuk janë përditësuar në faqen e Kryeministrisë, ministrat dhe zëvendëskryeministrja Mandija kanë nisur nga puna. Por pezull ka mbetur ndryshimi i drejtorit në Drejtorinë e Përgjithshme të Burgjeve, OSHEE dhe Zyrën e Regjistrimit të Pasurive të Paluajtshme. Madje vetëm dje është bërë publik emri i drejtorit të ALUIZNIT, Ibrahim Morina.
Kur të gjithë janë të fokusuar te fushata, ka kaluar thuajse në hije, detaji i rëndësishëm që po çalon në marrëveshjen Rama-Basha.
Siç u bë publike, ditë më parë, Basha i ka propozuar Ramës dy drejtorë; Arjan Hoxha i drejtorisë së Përgjithshme të Burgjeve (aktuali Miklovan Kopani) dhe Arben Ibro për drejtorinë e Regjistrimit të Pasurive të Paluajtshme (Hipotekave-aktuali Ilirjan Muho).
Profilet e ministrave në faqen e Kryeministrisë, asnjë përditësim të ministrave të rinj
Nga burime të sigurta mësohet se Rama i ka mbajtur pezull emërimet e tyre dhe Hoxha e Ibro nuk kanë nisur detyrën e re.
Por pse Rama po heziton? Pse nuk po i qëndron ai marrëveshjes me Bashën? Apo thjesht po fiton kohë?!
Arjan Hoxha, është i njohur për përplasjen e fortë që pati me ish-ministrin socialist Saimir Tahirin, pas arrestimit të babait të Tahirit. Hoxha u shkarkua, madje u hap edhe një komision hetimor ku akuzohej nga Partia Socialiste se kishte falsifikuar diplomën. A është kjo arsye e mjaftueshme, për të justifikuar mosemërimin?!
Arben Ibro, është propozuar nga demokratët, por nuk dihet pse Rama po mban pezull emërimin e tij sipas marrëveshjes. A po pret Rama një moment më të volitshëm për punonjësit e këtyre dy pjesëve të rëndësishme të administratës?!
Deri tani Rama ka zëvendësuar 6 ministra Arben Beqiri (Shëndetësi), Helga Vukaj (Financat), Dritan Demiraj (I Brendshëm), Mirela Karabina (E Arsimit) Xhuljeta Kërtusha (e Mirëqënies dhe Rinisë), Gazmend Bardhi (I Drejtësisë) dhe zëvendëskryeministrin Ledina Mandija. (V.G/SHUPLAKA)
Discussion about this post