Rikthehen tensionet në Valbonë, banorët iu bllokojnë rrugën punëtorëve të Gener 2: Na lini të jetojmë (Video+Foto)

Janë rikthyer mëngjesin e sotëm protestat në zonën e Valbonës, ku banorët po bllokojnë kalimin e punëtorëve të kompanisë Gener 2.

Ditën e djeshme për shkak të shpërthimeve të kryera nga kjo kompani, banorët kanë përjetuar tmerrin e tronditjeve, ndërsa defekte ka pësuar dhe linja elektrike.

Duke folur për Fax News njëri nga banorët e zonës, Dardan Demaliaj thotë se ka pasur dy shpërthime të fuqishme që kanë tronditur banorët, ndërsa sot ka një prani në zonë dhe të efektivëve të policisë.

‘’Në shpërthimin e  parë thashë se u shemb shtëpia nga tronditja, na lini të jetojmë. Janë sensibilizuar jo vetëm banorët, po edhe turistët e huaj, të cilëve iu kemi shpjeguar atë që po ndodh këtu.

Policia thjesht i ka shoqëruar nga vendngjarja dy punëtorët e Gener 2, nuk është se dimë më shumë rreth kësaj. Më pas janë liruar.

Që ditën e parë që kjo komopani ka ardhur në zonë na ka sjellë probleme, mëngjes, drekë, darkë ka pasur shpërthime minash, duke na e bërë të tmerrshme jetesën”, shprehet Demaliaj.

Kujtojmë se pas shpërthimeve djeshëm, dy punëtorë të Gener 2 u shoqëruan nga ana e Policisë, ndërsa banorët shprehen të vendosur në bllokimin e rrugës, pasi sipas tyre jetesa e tyre në banesa do të jetë e pamundur.

Ndërtimin e HEC-eve në zonën e Valbonës, e cila është një nga pasuritë më të mëdha natyrore të vendit, e kanë kundërshtuar haptazi dhe ambasadorët e vendeve më të rëndësishme në Shqipëri, si Donald Lu dhe Romana Vlahutin.

Që një vit më parë, përmes një letre ata i rekomandonin kryeministrit që të pezulloheshin menjëherë punimet, deri në një studim të plotë të mjedisit ku do të ndërtohen HEC-et.

(E.K/FAXWEB.AL)

https://www.youtube.com/watch?v=QKieET3b6WY&feature=youtu.be

https://www.youtube.com/watch?v=Nx29uPgmVWA&feature=youtu.be